నెల్లూరు క్యాన్సర్ ఆసుపత్రి అభివృద్ధికి రూ.10 లక్షల విరాళం

నెల్లూరు కలెక్టరేట్,  మేజర్ న్యూస్ :  సేవా కార్యక్రమాల్లో భాగంగా దగదర్తి గ్రామానికి చెందిన తాళ్ళూరి సోదరులు తమ ఉదారతను చాటుకున్నారు. నెల్లూరులో ఇండియన్ రెడ్ క్రాస్ సొసైటీ ఆధ్వర్యంలో నిర్వహిస్తున్న క్యాన్సర్ ఆసుపత్రి అభివృద్ధికి రూ.10 లక్షల విరాళాన్ని అందజేశారు. తమ తండ్రి స్వర్గీయ తాళ్ళూరి రమణయ్య నాయుడు జ్ఞాపకార్థం తాళ్ళూరి వెంకట కృష్ణ ప్రసాద్, తాళ్ళూరి రవిప్రసాద్ ఈ విరాళాన్ని అందించారు. బుధవారం జిల్లా కలెక్టరేట్‌లో జిల్లా కలెక్టర్ హిమాన్షు శుక్లాకు విరాళాన్ని అందజేశారు. ఈ కార్యక్రమంలో ఐఆర్‌సీఎస్ క్యాన్సర్ హాస్పిటల్ కోఆర్డినేటర్ యాలమూరి రంగయ్య నాయుడు, డీఆర్ఓ ఎన్. విజయ్ కుమార్ పాల్గొన్నారు.  ఈ సందర్భంగా తాళ్ళూరి సోదరులు మాట్లాడుతూ, పేద, నిరుపేద క్యాన్సర్ బాధితులకు మెరుగైన వైద్య సేవలు అందుబాటులోకి తీసుకురావాలనే ఉద్దేశంతో తమ తండ్రి జ్ఞాపకార్థం ఈ విరాళాన్ని అందించినట్లు తెలిపారు. క్యాన్సర్ ఆసుపత్రి అభివృద్ధి చెందితే ఆర్థికంగా వెనుకబడిన కుటుంబాలకు ఎంతో ప్రయోజనం చేకూరుతుందని ఆశాభావం వ్యక్తం చేశారు.  విరాళం అందించిన తాళ్ళూరి సోదరులను జిల్లా కలెక్టర్ హిమాన్షు శుక్ల ప్రత్యేకంగా అభినందించారు. సమాజ సేవలో భాగస్వాములవుతూ, పేద రోగులకు వైద్య సేవలు అందించేందుకు సహకరించడం అభినందనీయమని పేర్కొన్నారు.  ఈ కార్యక్రమంలో రెడ్ క్రాస్ సభ్యులు, తదితరులు పాల్గొన్నారు.