డ్రగ్స్ రహిత సమాజ నిర్మాణమే లక్ష్యం
కావలి, మేజర్ న్యూస్ : యువతను మాదకద్రవ్యాల బారిన పడకుండా కాపాడి, డ్రగ్స్ రహిత సమాజ నిర్మాణమే లక్ష్యంగా కావలి మండలం రుద్రకోట ప్రభుత్వ పాలిటెక్నిక్ కళాశాలలో బుధవారం 'ఈగల్' (EAGLE) ప్రత్యేక పోలీసు బృందం ఆధ్వర్యంలో అవగాహన కార్యక్రమం నిర్వహించారు. ఈ సదస్సులో కళాశాల విద్యార్థులు, ఇండోసోల్ పరిశ్రమ ఉద్యోగులకు డ్రగ్స్ వినియోగం వల్ల కలిగే తీవ్ర అనర్థాలు, ఆరోగ్య సమస్యలు మరియు చట్టపరమైన శిక్షల గురించి వివరించారు. చెడు సావాసాలకు దూరంగా ఉండాలని, వ్యసనపరులకు కౌన్సెలింగ్ మరియు పునరావాసం అందించే మార్గాలను తెలియజేశారు. అలాగే, 'EAGLE AP 1972' పోర్టల్ ద్వారా డ్రగ్స్‌కు వ్యతిరేకంగా ప్రతిజ్ఞ చేసి సర్టిఫికెట్లు పొందే విధానాన్ని అవగాహన పరిచారు. అనంతరం విద్యార్థులు, ఉద్యోగులు మాదకద్రవ్యాలకు దూరంగా ఉంటామని ప్రతిజ్ఞ చేశారు. ఈ కార్యక్రమంలో కళాశాల అధ్యాపకులు, సిబ్బంది, ఇండోసోల్ ప్రతినిధులు మరియు ఈగల్ టీమ్ సభ్యులు పాల్గొన్నారు.
