ప్రతి విద్యార్థికి హాస్టల్ వసతి కల్పించాలి

ఎడ్యుకేషన్ స్టాఫ్ రిపోర్టర్ : శ్రీపద్మావతి మహిళా డిగ్రీ పీజీ కళాశాలలో ప్రవేశం పొందిన ప్రతి విద్యార్థినికి హాస్టల్ వసతి కల్పించాలని విద్యార్థి సంఘాల జేఏసీ నాయకులు డిమాండ్ చేశారు.ఇతర ప్రాంతాల నుంచి చదువుకోవడానికి వచ్చే పేద, గ్రామీణ విద్యార్థినులు ప్రైవేట్ హాస్టళ్లలో అధిక ఖర్చులు భరించలేక ఇబ్బందులు పడుతున్నారని, వారందరికీ హాస్టల్ వసతి కల్పించాలని బుధవారం ప్రిన్సిపాల్ భీమన్నకు వినతిపత్రం అందజేశారు. పద్మావతి అమ్మవారి పేరుతో కొనసాగుతున్న విద్యాసంస్థల్లో విద్యార్థుల భద్రతకు అత్యుత్త ప్రాధాన్యత ఇవ్వాలని కోరారు. హాస్టల్ సీట్లు సరిపోకపోతే అదనపు వసతి సౌకర్యాలు కల్పనకు సంబంధిత ఉన్నతాధికారులు చర్యలు తీసుకోవాలని విజ్ఞప్తి చేశారు. అలాగే హాస్టల్‌లో సీసీటీవీ కెమెరాలు, మహిళా వార్డెన్లు, తగిన భద్రతా సిబ్బంది, నాణ్యమైన ఆహారం, తాగునీరు, పారిశుద్ధ్యం వంటి మౌలిక సదుపాయాలు కల్పించాలని డిమాండ్ చేశారు. రాజ్యాంగంలో కల్పించిన సమానత్వం వ్యక్తిగత గౌరవం వంటి విలువలకు అనుగుణంగా విద్యార్థినిలు సంక్షేమాన్ని దృష్టిలో ఉంచుకొని కళాశాలలో ప్రవేశం పొందిన ప్రతి విద్యార్థినికి హాస్టల్ వసతి కల్పించేందుకు అవసరమైన చర్యలు తీసుకోవాలని టిటిడిని కోరారు. ప్రిన్సిపాల్ కు వినతి ఇచ్చిన వారిలో వాల్మీకి విద్యార్థి సంఘం అధ్యక్షురాలు వినుత, భారతీయ దళిత విద్యార్థి సేన వ్యవస్థాపక అధ్యక్షులు కొండ యుగంధర్, బిజెఆర్ఎస్ఎఫ్ అర్జున్, బిఎస్ఎఫ్ కృష్ణ, శివకుమార్, నాగార్జున, మహేష్ వినతి ఇచ్చిన వారిలో ఉన్నారు. 

సీఎం గౌడ్ తిరుపతి స్టాప్ రిపోర్టర్