ప్రతి ఒక్కరికీ సమాన న్యాయం అందాలి

గాజువాక, సూర్య :  ఆర్థిక పరిస్థితులతో సంబంధం లేకుండా సమాజంలోని ప్రతి ఒక్కరికీ సమాన న్యాయం అందుబాటులో ఉండాలని, న్యాయం పొందడం అందరి హక్కని న్యాయమూర్తులు పేర్కొన్నారు. జాతీయ న్యాయ సేవా దినోత్సవాన్ని పురస్కరించుకుని శుక్రవారం గాజువాక కోర్టు సముదాయంలో 13వ అదనపు జిల్లా, సెషన్స్ న్యాయమూర్తి ఎస్.ఎం. ఫణికుమార్ ఆధ్వర్యంలో వేడుకలను ఘనంగా నిర్వహించారు. ఈ సందర్భంగా న్యాయమూర్తులు, న్యాయవాదులు, పోలీసు అధికారులు, సిబ్బందితో కలిసి కోర్టు సముదాయం నుంచి 100 అడుగుల రోడ్డు సిగ్నల్ వరకు భారీ అవగాహన ర్యాలీ చేపట్టారు. అనంతరం అక్కడ మానవహారంగా ఏర్పడి జాతీయ న్యాయ సేవా దినోత్సవ ప్రాధాన్యాన్ని ప్రజలకు వివరించారు. ఆర్థికంగా వెనుకబడిన వర్గాలు, అర్హులైన ప్రతి ఒక్కరికీ ఉచిత న్యాయ సహాయం అందించే విధానాలపై ప్రజల్లో విస్తృత అవగాహన కల్పించారు. ఈ కార్యక్రమంలో 8వ అదనపు జిల్లా, సెషన్స్ న్యాయమూర్తి ఎస్. కవిత, ప్రిన్సిపల్ సివిల్ జడ్జి (సీనియర్ డివిజన్) డి. గీతారాణి, సివిల్ జడ్జి (జూనియర్ డివిజన్) మరియు 9వ అదనపు జ్యుడీషియల్ ఫస్ట్ క్లాస్ మేజిస్ట్రేట్ సంగవరపు సూర్యకిరణ్ శ్రీ, విశాఖ సిటీ సౌత్ ఏసీపీ వై. శ్రీనివాసరావు, గాజువాక సీఐ చింతా వాసునాయుడు, దువ్వాడ సీఐ నమ్మి గణేష్, గాజువాక ట్రాఫిక్ ఎస్‌హెచ్‌ఓ షేక్ హుస్సేన్, పలువురు న్యాయవాదులు, కోర్టు, పోలీసు సిబ్బంది పాల్గొన్నారు.