ప్రశాంతంగా సాగుతున్న పోలింగ్: ఎమ్మెల్యే దగ్గుపాటి ప్రసాద్

అనంతపురం బ్యూరో మేజర్ న్యూస్ : నగరంలో స్థానిక సంస్థల ఎన్నికల పోలింగ్ అత్యంత ప్రశాంతమైన వాతావరణంలో జరుగుతోందని ఎమ్మెల్యే దగ్గుపాటి ప్రసాద్ పేర్కొన్నారు. ఆదివారం ఆయన తన కుటుంబ సభ్యులతో కలిసి 43వ డివిజన్లోని ఝాన్సీ లక్ష్మీబాయి పాఠశాలలో ఏర్పాటు చేసిన పోలింగ్ బూత్ వద్ద తన ఓటు హక్కును వినియోగించుకున్నారు.

​ఈ సందర్భంగా పోలింగ్ బూత్ వద్దకు చేరుకున్న మంత్రి సత్య కుమార్ గారితో కలిసి ఎమ్మెల్యే దగ్గుపాటి ఓటింగ్ సరళిని క్షేత్రస్థాయిలో పరిశీలించారు. అనంతరం ఆయన మీడియాతో మాట్లాడుతూ... నగరంలోని 62 డివిజన్లలో ఎలాంటి అలజడులు లేకుండా, ప్రజలు స్వేచ్ఛగా ఓటు వేసుకునేలా అధికారులు పటిష్ట ఏర్పాట్లు చేశారని తెలిపారు.

​గత ఎన్నికల దౌర్జన్యాలకు స్వస్తి

2021 స్థానిక ఎన్నికల్లో గత ప్రభుత్వం దౌర్జన్యాలు, బెదిరింపులకు పాల్పడి, ప్రజలను భయభ్రాంతులకు గురిచేసి 85% స్థానాలను ఏకగ్రీవం చేసుకుందని ఎమ్మెల్యే మండిపడ్డారు. నాటి భయానక పరిస్థితులు ఈరోజు నగరంలో ఎక్కడా లేవని స్పష్టం చేశారు.

​నిష్పక్షపాతంగా ఎన్నికలు

కూటమి ప్రభుత్వంలో బెదిరింపుల సంస్కృతికి తావులేదని, ఎన్నికలను పూర్తి ప్రజాస్వామ్యబద్ధంగా నిర్వహించాలనేదే ముఖ్యమంత్రి నారా చంద్రబాబు నాయుడు గారి దృఢ సంకల్పమని చెప్పారు. సీఎం ఆదేశాల మేరకు అధికారులు, యంత్రాంగం నిష్పక్షపాతంగా వ్యవహరిస్తున్నాయని కొనియాడారు. ప్రజలందరూ ఎలాంటి భయాందోళనలు లేకుండా ఓటింగ్ ప్రక్రియలో పాల్గొనాలని పిలుపునిచ్చారు. నగరంలో కూటమి ప్రభుత్వం చేపడుతున్న వాస్తవ ప్రగతిని చూసి ప్రజలు ఓటు వేస్తున్నారని ఆయన ధీమా వ్యక్తం చేశారు.

రిపోర్టర్ : మొయినుద్దీన్ అనంతపురం బ్యూరో మేజర్ న్యూస్.