ప్రశాంతమైన పోలింగ్ నిర్వహణపై కూటమి జడ్పీటీసీ అభ్యర్థి బలగ ప్రవీణ్ కుమార్ హర్షం

నరసన్నపేట,  సూర్య : మండలంలో జడ్పీటీసీ, ఎంపీటీసీ ఎన్నికల పోలింగ్ ప్రశాంత వాతావరణంలో కొనసాగుతున్న నేపథ్యంలో కూటమి జడ్పీటీసీ అభ్యర్థి బలగ ప్రవీణ్ కుమార్ గురువారం మండలంలోని పలు పోలింగ్ కేంద్రాలను సందర్శించి ఓటింగ్ సరళిని పరిశీలించారు. పోలింగ్ కేంద్రాల వద్ద పరిస్థితులను గమనించి, ఓటర్లు శాంతియుతంగా తమ ఓటు హక్కును వినియోగించుకోవడంపై సంతృప్తి వ్యక్తం చేశారు. ప్రజాస్వామ్య ప్రక్రియలో బాధ్యతగా పాల్గొని ఓటు హక్కును వినియోగించుకున్న ప్రతి ఒక్కరికీ ఆయన కృతజ్ఞతలు తెలిపారు. మండలంలో ఎన్నికల నిర్వహణ ప్రశాంతంగా, సజావుగా జరిగేందుకు కృషి చేసిన ఎన్నికల అధికారులు, సిబ్బంది, పోలీసు శాఖ అధికారులకు ప్రత్యేక ధన్యవాదాలు తెలియజేశారు.

ప్రజలు పరస్పర సామరస్యంతో ఎన్నికల ప్రక్రియలో పాల్గొనడం అభినందనీయమని, నరసన్నపేట మండలంలో పోలింగ్ నిర్వహణ ఆదర్శంగా నిలిచిందని పేర్కొన్నారు. ఈ ఎన్నికల్లో కూటమి ప్రభుత్వానికి అనుకూలంగా ఓటరు నాడి స్పష్టంగా కనిపిస్తోందని ఆయన వ్యాఖ్యానించారు. ఈ పర్యటనలో నరసన్నపేటకు చెందిన పలువురు టీడీపీ నాయకులు ఆయన వెంట ఉన్నారు.