ప్రపంచ టాప్ 2% శాస్త్రవేత్తల జాబితాలో ఆదిమూలంవారిపాలెం వాసి

డా.బి.ఆర్.అంబేద్కర్ కోనసీమ జిల్లా పి.గన్నవరం మేజర్ న్యూస్ :: ఆంధ్రప్రదేశ్ గ్రామీణ ప్రాంతానికి చెందిన యువ పరిశోధకుడు అంతర్జాతీయ స్థాయిలో అరుదైన ప్రతిభ చాటారు. ఆదిమూలంవారిపాలెం గ్రామానికి చెందిన ప్రముఖ పరిశోధకుడు డాక్టర్ తిరుమనాధం ఎన్.ఎస్.కోటి మణికుమార్ ప్రపంచ ప్రఖ్యాత స్టాన్‌ఫోర్డ్ యూనివర్సిటీ విడుదల చేసిన అంతర్జాతీయ 'టాప్ 2% శాస్త్రవేత్తల' జాబితాలో చోటు దక్కించుకున్నారు. ప్రస్తుతం ఆయన అమరావతి సమీపంలోని విట్-ఏపీ (VIT-AP) విశ్వవిద్యాలయంలో అసిస్టెంట్ ప్రొఫెసర్‌గా సేవలందిస్తున్నారు.

ఆర్టిఫిషియల్ ఇంటెలిజెన్స్ (AI), మెషిన్ లెర్నింగ్ (ML) మరియు ఇమేజ్ ప్రాసెసింగ్ రంగాలలో ఆయన ప్రచురించిన పరిశోధనా పత్రాలు, సైటేషన్ల నాణ్యతకు గుర్తింపుగా ఈ అరుదైన గౌరవం లభించింది. అంతర్జాతీయ రీసెర్చ్ పబ్లిషర్ ఎల్సెవియర్ (Elsevier) మరియు అమెరికాలోని స్టాన్‌ఫోర్డ్ విశ్వవిద్యాలయం సంయుక్తంగా రూపొందించిన 2026 వార్షిక జాబితాలో భారత్ నుంచి మొత్తం 3,898 మంది శాస్త్రవేత్తలు ఎంపిక కాగా, అందులో డాక్టర్ మణికుమార్ స్థానం సంపాదించడం విశేషం.

తమ గ్రామానికి చెందిన వ్యక్తి గ్లోబల్ వేదికపై ఇంతటి ఘనత సాధించడం పట్ల ఆదిమూలంవారిపాలెం గ్రామస్థులు, కుటుంబ సభ్యులు మరియు విద్యావేత్తలు తీవ్ర హర్షం వ్యక్తం చేస్తూ ఆయనకు అభినందనలు తెలిపారు. ఈ సందర్భంగా డాక్టర్ కోటి మణికుమార్ స్పందిస్తూ.. ప్రపంచ టాప్ 2% శాస్త్రవేత్తల జాబితాలో స్థానం దక్కడం ఎంతో సంతోషాన్ని, గర్వాన్ని ఇచ్చిందని పేర్కొన్నారు. ఈ అంతర్జాతీయ గుర్తింపు భవిష్యత్తులో మరింత నాణ్యమైన పరిశోధనలు కొనసాగించడానికి గొప్ప ప్రేరణగా నిలుస్తుందని, సమాజానికి మేలుచేసే అత్యాధునిక ఆర్టిఫిషియల్ ఇంటెలిజెన్స్ ఆధారిత ఆవిష్కరణలపై దృష్టి సారిస్తానని స్పష్టం చేశారు.