ప్రభుత్వ పాఠశాలల్లో విద్యార్థులకు భద్రత కరువు – గోపిక లక్ష్మిపై దాడి ఘటనను తీవ్రంగా ఖండించిన ఏఐఎస్ఎఫ్

ఏలూరు, మేజర్ న్యూస్ :అనంతపురం జిల్లా రాప్తాడు మండలంలోని జిల్లా పరిషత్ ఉన్నత పాఠశాలలో పదో తరగతి చదువుతున్న విద్యార్థిని గోపిక లక్ష్మిపై జరిగిన విచక్షణారహిత దాడి ఘటనను అఖిల భారత విద్యార్థి సమాఖ్య  ఏలూరు జిల్లా అధ్యక్షులు డి. శివకుమార్ తీవ్రంగా ఖండించారు.

ఈ సందర్భంగా ఆయన మాట్లాడుతూ రాష్ట్రంలోని ప్రభుత్వ పాఠశాలల్లో చదువుతున్న విద్యార్థులకు కనీస భద్రత కూడా లేకపోవడం అత్యంత ఆందోళనకరమని అన్నారు. రాష్ట్రంలోని నలుమూలల ప్రభుత్వ పాఠశాలల్లో ఏదో ఒక రూపంలో భద్రతా లోపాలు కనిపిస్తున్నాయని, కొన్ని పాఠశాలలకు ప్రహరీ గోడలు ఉంటే గేట్లు ఉండటం లేదని, గేట్లు ఉంటే ప్రహరీ గోడలు ఉండటం లేదని, మరికొన్ని పాఠశాలలకు కనీసం గేట్లు కూడా లేని దుస్థితి నెలకొందని విమర్శించారు.

కేవలం పాఠశాలల చుట్టూ ప్రహరీ గోడలు నిర్మించి, గేట్లు ఏర్పాటు చేస్తే సరిపోదని, పాఠశాల ఆవరణలోకి బయటి వ్యక్తులు యథేచ్ఛగా ప్రవేశించకుండా నిరంతరం పర్యవేక్షణ ఉండాలని అన్నారు. ఇందుకోసం ప్రతి ప్రభుత్వ పాఠశాలకు తప్పనిసరిగా వాచ్‌మెన్ లేదా సెక్యూరిటీ సిబ్బందిని నియమించాలని డిమాండ్ చేశారు. విద్యాశాఖ మంత్రి నారా లోకేష్ ఇప్పటికైనా స్పందించి రాష్ట్రంలోని ప్రభుత్వ పాఠశాలల్లో నెలకొన్న భద్రతా లోపాలపై సమీక్ష నిర్వహించి తక్షణ చర్యలు చేపట్టాలని డిమాండ్ చేశారు.