పొట్టి శ్రీరాములు త్యాగం చిరస్మరణీయం: జిల్లా కలెక్టర్ హిమాన్షు శుక్ల

నెల్లూరు,  మేజర్ న్యూస్ :   ఆంధ్ర రాష్ట్ర అవతరణ దినోత్సవాన్ని పురస్కరించుకుని ఆదివారం నెల్లూరు కలెక్టరేట్‌లోని ఎస్.ఆర్. శంకరన్ హాలులో జిల్లా కలెక్టర్ హిమాన్షు శుక్లా పొట్టి శ్రీరాములు చిత్రపటానికి పూలమాల వేసి ఘనంగా నివాళులర్పించారు.  

ఈ సందర్భంగా కలెక్టర్ మాట్లాడుతూ, ప్రత్యేక ఆంధ్ర రాష్ట్ర సాధన కోసం అమరజీవి పొట్టి శ్రీరాములు చేసిన నిరాహార దీక్ష, ప్రాణత్యాగం చరిత్రలో చిరస్థాయిగా నిలిచిపోతాయని పేర్కొన్నారు. తెలుగు ప్రజల ఆకాంక్షలకు అనుగుణంగా ప్రత్యేక ఆంధ్ర రాష్ట్ర ఏర్పాటుకు ఆయన చేసిన పోరాటం స్ఫూర్తిదాయకమని తెలిపారు. పొట్టి శ్రీరాములు పోరాట ఫలితంగా ఆంధ్ర రాష్ట్రం ఏర్పడటం తెలుగు ప్రజల చరిత్రలో ఒక ముఖ్యమైన మైలురాయిగా నిలిచిందన్నారు. పొట్టి శ్రీరాములు ఆశయాలను స్మరించుకుంటూ, ఆయన త్యాగస్ఫూర్తిని భావితరాలకు తెలియజేయాల్సిన బాధ్యత మనందరిపై ఉందని కలెక్టర్ పేర్కొన్నారు.

ఈ కార్యక్రమంలో డీఆర్వో విజయకుమార్, కలెక్టరేట్ అధికారులు, సిబ్బంది పాల్గొన్నారు.