పూజ పేరుతో బంగారం అపహరణ
పెదవేగి మేజర్ న్యూస్ :పూజలు చేసి ఆరోగ్య సమస్యలు తొలగిస్తామని నమ్మించి ఓ వృద్ధురాలి బంగారు చెవిదిద్దును దొంగిలించారు.
బుధవారం ఉదయం కొందరు భవానీమాలధారులు అన్నదానం కోసం చందాలు సేకరిస్తూ పెదవేగి గ్రామంలో ఇంటింటికీ వెళ్లారు.
ఈ క్రమంలో కాసాని అలివేలమ్మ అనే వృద్ధురాలి ఇంటికి వెళ్లి, ఆమె భర్త అనారోగ్యంతో బాధపడుతున్నాడని, అతనిపై చేతబడి జరిగిందని చెప్పారు.
పూజ చేస్తే ఆరోగ్యం బాగుపడుతుందని నమ్మించారు. దీంతో భయపడిన వృద్ధురాలు పూజ కోసం తన బంగారు చెవిదిద్దులను ఇచ్చింది.
పూజ చేస్తున్నట్లు నటించిన వ్యక్తి, పూజ పూర్తయిన తర్వాత ఒక చెవిదిద్దును తీసుకుని ద్విచక్రవాహనంపై పరారయ్యాడు.
దీంతో బాధితులు పోలీసులను ఆశ్రయించారు. ఏఎస్ఐ ఎన్. లక్ష్మీనారాయణ సమీపంలోని సీసీటీవీ కెమెరాలను పరిశీలించారు. నిందితులు నంబర్ ప్లేట్లు లేని రెండు ద్విచక్రవాహనాలపై వచ్చినట్లు గుర్తించారు.
ఈ ఘటనపై పోలీసులు దర్యాప్తు చేస్తున్నారు.