పోలీసు గ్రీవెన్స్‌లో 74 ఫిర్యాదులు స్వీకరణ... ప్రతి ఫిర్యాదుపై సమగ్ర విచారణ జరపాలి
శ్రీకాకుళం, సూర్య : ప్రజల నుంచి అందే ఫిర్యాదుల పట్ల నిర్లక్ష్యం వహించకుండా, ప్రతి ఫిర్యాదుపై చట్టప్రకారం సమగ్ర విచారణ చేపట్టి, త్వరితగతిన పరిష్కార చర్యలు తీసుకోవాలని జిల్లా ఎస్పీ కె.వి. మహేశ్వరరెడ్డి పోలీసు అధికారులను ఆదేశించారు.
సోమవారం శ్రీకాకుళం జిల్లా పోలీసు కార్యాలయంలో నిర్వహించిన ప్రజా ఫిర్యాదుల స్వీకరణ (పబ్లిక్ గ్రీవెన్స్) కార్యక్రమంలో జిల్లా నలుమూలల నుంచి వచ్చిన ప్రజల నుంచి ఎస్పీ మొత్తం 74 ఫిర్యాదులను స్వీకరించారు. ఫిర్యాదుదారులతో స్వయంగా మాట్లాడి వారి సమస్యలను అడిగి తెలుసుకున్నారు.
అనంతరం సంబంధిత పోలీసు అధికారులతో ఫోన్‌లో మాట్లాడి, ఫిర్యాదులపై వెంటనే విచారణ ప్రారంభించి, చట్టపరమైన చర్యల ద్వారా సమస్యలను త్వరితగతిన పరిష్కరించాలని ఆదేశించారు. ప్రతి అర్జీని ప్రత్యేక శ్రద్ధతో పరిశీలించి, బాధితులకు సత్వర న్యాయం అందేలా చర్యలు తీసుకోవాలని స్పష్టం చేశారు.
ఈ కార్యక్రమంలో కుటుంబ వివాదాలు, ఆస్తి తగాదాలు, మోసపూరిత కేసులు, పౌర సంబంధిత సమస్యలు తదితర అంశాలపై ఫిర్యాదులు అందాయి. ఆయా ఫిర్యాదులపై చేపట్టిన విచారణ, తీసుకున్న చర్యల వివరాలతో కూడిన సమగ్ర నివేదికను జిల్లా పోలీసు కార్యాలయానికి సమర్పించాలని సంబంధిత అధికారులను ఎస్పీ ఆదేశించారు.
రిపోర్టర్ : గోపాల్ కృష్ణ, నరసన్నపేట, శ్రీకాకుళం జిల్లా.
