పొదలకూరులో వీధి కుక్కల బెడద..

గుంపులుగా సంచారం.. ప్రజల్లో భయాందోళన..

పొదలకూరు, మేజర్ న్యూస్:  పొదలకూరు పట్టణంలో వీధి కుక్కల బెడద రోజురోజుకూ పెరుగుతోందని స్థానికులు ఆందోళన వ్యక్తం చేస్తున్నారు. ప్రధాన రహదారులు, కాలనీల్లో గుంపులు గుంపులుగా సంచరిస్తున్న కుక్కలు వాహనదారుల వెంట పరుగులు తీస్తుండటంతో ప్రమాదాల భయం నెలకొంది. చిన్నారులు, మహిళలు, వృద్ధులు రోడ్లపైకి రావాలంటేనే భయపడాల్సిన పరిస్థితి ఉందని స్థానికులు చెబుతున్నారు. ముఖ్యంగా నరసారెడ్డి కాలనీలో వీధి కుక్కల సమస్య తీవ్రంగా ఉందని స్థానికులు పేర్కొంటున్నారు. రోడ్లనే ఆవాసాలుగా చేసుకుని గుంపులుగా తిరుగుతున్న కుక్కల కారణంగా ఎప్పుడు ఏ ప్రమాదం జరుగుతుందోనని ప్రజలు ఆందోళన చెందుతున్నారు. ద్విచక్ర వాహనదారుల వెంట కుక్కలు పరుగులు తీయడంతో వాహనాలు అదుపుతప్పి ప్రమాదాలు జరిగే అవకాశం ఉందని చెబుతున్నారు.

ప్రభుత్వ కార్యాలయాల పరిసరాల్లోనూ ఇదే పరిస్థితి  :  నరసారెడ్డి కాలనీ సమీపంలోనే తహసీల్దార్ కార్యాలయం, సచివాలయం, వ్యవసాయ శాఖ కార్యాలయం తదితర ప్రభుత్వ కార్యాలయాలు ఉన్నాయి. వివిధ పనుల నిమిత్తం ప్రతిరోజూ వందలాది మంది ప్రజలు ఈ కార్యాలయాలకు రాకపోకలు సాగిస్తుంటారు. అయితే కార్యాలయాల పరిసరాల్లోనే వీధి కుక్కలు గుంపులుగా సంచరిస్తుండటంతో ప్రజలు ఇబ్బందులు ఎదుర్కొంటున్నారని స్థానికులు చెబుతున్నారు. మహిళలు, చిన్నారులు, వృద్ధులు కుక్కల గుంపులను దాటుకుని వెళ్లాల్సి వస్తోందని, ముఖ్యంగా ఉదయం, సాయంత్రం వేళల్లో పరిస్థితి మరింత ఇబ్బందికరంగా ఉంటోందని అంటున్నారు.

ప్రమాదం జరిగాకే చర్యలా?  వీధి కుక్కల నియంత్రణకు సంబంధిత అధికారులు తక్షణ చర్యలు చేపట్టాలని స్థానికులు కోరుతున్నారు. సమస్యపై పలుమార్లు పంచాయతీ అధికారుల దృష్టికి తీసుకెళ్లినా పరిష్కారం కనిపించడం లేదని వారు ఆవేదన వ్యక్తం చేస్తున్నారు. ప్రజలకు ఇబ్బందులు కలగకుండా కుక్కల నియంత్రణకు శాస్త్రీయ, నిబంధనలకు అనుగుణమైన చర్యలు చేపట్టాలని డిమాండ్ చేస్తున్నారు. ప్రజలకు ఇబ్బందులు, ప్రమాదాలు ఎదురుకాకముందే అధికారులు స్పందించి నరసారెడ్డి కాలనీలో, అలాగే పట్టణంలోని ఇతర ప్రాంతాల్లో వీధి కుక్కల సమస్యను పరిష్కరించాలని స్థానికులు కోరుతున్నారు.