పంట నష్ట వివరాలను రైతులే నమోదు చేసుకునే అవకాశం

ఆమదాలవలస, సూర్య  : అర్నబ్ తుఫాను ప్రభావంతో కురిసిన భారీ వర్షాల కారణంగా పంట నష్టం జరిగిన రైతులు తమ పంట నష్ట వివరాలను స్వయంగా ఆన్‌లైన్‌లో నమోదు చేసుకోవచ్చని మండల వ్యవసాయ అధికారి మెట్ట మోహనరావు తెలిపారు. రైతుల సౌకర్యార్థం ప్రభుత్వం పంట నష్టం వివరాలను నమోదు చేసుకునే అవకాశాన్ని కల్పించిందని పేర్కొన్నారు.రైతులు కర్షక్ .ఏపీ వెబ్‌సైట్‌ను సందర్శించి లేదా QR కోడ్‌ను స్కాన్ చేసి పంట నష్టం వివరాలను నమోదు చేసుకోవచ్చు. ముందుగా రైతు వివరాలు, ఆధార్ నంబర్ నమోదు చేసి, మొబైల్‌కు వచ్చిన ఓటీపీ ద్వారా ధ్రువీకరణ పూర్తి చేయాలి. అనంతరం సంబంధిత జిల్లా, మండలం, గ్రామం, సర్వే నంబర్, దెబ్బతిన్న పంట వివరాలు, నష్టపోయిన విస్తీర్ణాన్ని నమోదు చేసి, పంట నష్టానికి సంబంధించిన ఫొటోలను అప్‌లోడ్ చేయాలి.నమోదు చేసిన వివరాలను జాగ్రత్తగా పరిశీలించి సబ్‌మిట్ చేయాలని, నష్టం జరిగిన ప్రతి సర్వే నంబర్‌కు సంబంధించిన వివరాలను తప్పనిసరిగా నమోదు చేయాలని సూచించారు. రైతులందరూ ఈ అవకాశాన్ని రైతులు సద్వినియోగం చేసుకుని తమ పంట నష్ట వివరాలను ఆన్‌లైన్‌లో నమోదు చేసుకోవాలని కోరారు.