పిఠాపురం నియోజకవర్గంలో పవన్ కళ్యాణ్ పర్యటన.. చేబ్రోలు శ్రీ సీతారామస్వామి వారిని దర్శించుకున్న ఉప ముఖ్యమంత్రి

సూర్య పొలిటికల్ డెస్క్: ఆంధ్రప్రదేశ్ రాష్ట్ర ఉప ముఖ్యమంత్రి పవన్ కళ్యాణ్ పిఠాపురం నియోజకవర్గంలో పర్యటించారు. ఏకాదశి వ్రతాచరణలో భాగంగా మంగళవారం ఉదయం ఆయన చేబ్రోలు గ్రామంలోని శ్రీ సీతారామస్వామి వారిని దర్శించుకున్నారు. ఈ సందర్భంగా స్వామివారి ప్రాతఃకాల సేవలో పాల్గొని ప్రత్యేక పూజలు నిర్వహించారు. ఆలయ అర్చకులు ఆయనకు వేద మంత్రోచ్ఛారణలతో స్వాగతం పలికి తీర్థప్రసాదాలు అందజేశారు.

సార్వత్రిక ఎన్నికల ప్రచార సమయంలో చేబ్రోలులోని శ్రీ సీతారామస్వామి వారి ఆలయం సమీపంలో పవన్ కళ్యాణ్ బహిరంగ సభ నిర్వహించిన విషయం తెలిసిందే. ఎన్నికల్లో విజయం సాధించిన తర్వాత ఇచ్చిన మాట ప్రకారం ఆలయ అభివృద్ధికి ఆయన ప్రత్యేక చొరవ చూపారు. రెండు విడతలుగా దాదాపు రూ.90 లక్షల నిధులను మంజూరు చేయించారు. ఆ నిధులతో ఆలయంలో కాలక్షేప మండపం, రథశాల, అన్నదానం కోసం ప్రత్యేక హాలు, యాగశాల నిర్మాణంతో పాటు పలు అభివృద్ది కార్యక్రమాలను ముమ్మరంగా చేపట్టారు. ఆలయ అభివృద్ధికి కృషి చేస్తున్న ఉప ముఖ్యమంత్రిని స్థానికులు, పార్టీ శ్రేణులు అభినందించారు