హైదరాబాద్ మాదాపూర్లో ఓయో రూమ్లో యువతి హత్య, ప్రియుడు పరారీ
సూర్య క్రైమ్ డెస్క్: హైదరాబాద్లోని మాదాపూర్ సిద్దిఖీనగర్లో తీవ్ర ఉద్రిక్తత, కలకలం రేపిన ఘటన వెలుగులోకి వచ్చింది. విశాఖపట్నానికి చెందిన షారోన్ నిఖిత అనే యువతి ఓయో రూమ్లో అనుమానాస్పద రీతిలో మృతి చెందింది. తన ప్రియుడు శ్రీనివాస రవితేజతో కలిసి ఆమె ఆ గదికి వెళ్లినట్లు పోలీసుల ప్రాథమిక విచారణలో తేలింది. అర్ధరాత్రి దాటిన తర్వాత అపస్మారక స్థితిలో ఉన్న యువతిని హోటల్ నిర్వాహకుల సహాయంతో ఆ యువకుడు హుటాహుటిన ఆసుపత్రికి తరలించాడు. అయితే, అప్పటికే యువతి మృతి చెందినట్లు వైద్యులు ధృవీకరించారు.
ఈ ఘటనపై సమాచారం అందుకున్న పోలీసులు వెంటనే రంగంలోకి దిగి హోటల్ గదిని పరిశీలించారు. మృతురాలి ముఖం, తలపై తీవ్రమైన గాయాలు ఉన్నట్లు గుర్తించారు. అలాగే హోటల్ గదిలోని గోడలపై, బెడ్షీట్పై రక్తపు మరకలు ఉండటంతో ఇది ముందస్తు పథకం ప్రకారం జరిగిన హత్యగా పోలీసులు భావిస్తున్నారు. ఆసుపత్రికి చేర్చిన తర్వాత యువతి మృతి చెందిన విషయం తెలుసుకున్న ప్రియుడు శ్రీనివాస రవితేజ అక్కడి నుంచి పరారయ్యాడు. నిందితుడి ఆచూకీ కోసం పోలీసులు ప్రత్యేక బృందాలను రంగంలోకి దంపి గాలింపు చర్యలు ముమ్మరం చేశారు.
