తాడిగడప, ఉయ్యూరులో వైసీపీ గెలిస్తే రాజీనామా చేస్తా: బోడే ప్రసాద్
తాడిగడప మున్సిపాలిటీ, ఉయ్యూరు మున్సిపాలిటీల్లో ఏదో ఒక మున్సిపాలిటీలో వైసీపీ గెలిస్తే తాను రాజీనామా చేస్తానని పెనమలూరు ఎమ్మెల్యే బోడే ప్రసాద్ సవాల్ చేశారు. వైసీపీ నాయకులు ప్రగల్భాలు పలకకుండా అభ్యర్థులను బరిలోకి దించి ప్రజల తీర్పును ఎదుర్కోవాలని అన్నారు.
పోరంకిలోని టీడీపీ కార్యాలయంలో నియోజకవర్గానికి చెందిన 70 మంది లబ్ధిదారులకు రూ.70 లక్షల విలువైన ముఖ్యమంత్రి సహాయనిధి చెక్కులను ఎమ్మెల్యే పంపిణీ చేశారు. కూటమి ప్రభుత్వం ఏర్పడిన రెండున్నరేళ్లలో పెనమలూరు నియోజకవర్గంలో సుమారు రూ.25 కోట్ల సీఎంఆర్ఎఫ్ చెక్కులు పంపిణీ చేసినట్లు తెలిపారు.
గత ప్రభుత్వం పూర్తి చేయకుండా వదిలేసిన సిద్ధార్థ ఇంజనీరింగ్ కాలేజీ ఫ్లైఓవర్, మద్దూరు–ఉప్పులూరు రహదారి వంటి పనులను పూర్తి చేశామని, కుందేరు అభివృద్ధికి నిధులు తీసుకొచ్చామని చెప్పారు. సుమారు రూ.105 కోట్లతో మాస్టర్ప్లాన్ రోడ్ల అభివృద్ధికి చర్యలు కొనసాగుతున్నాయని వెల్లడించారు.
తనను “రీల్ స్టార్” అంటూ చేస్తున్న విమర్శలపై స్పందిస్తూ, “నేను రీల్ స్టార్నే.. మరి మీ నాయకుడు జగన్మోహన్రెడ్డి సోషల్ మీడియాలో రీల్స్ ఎందుకు చేస్తున్నారు?” అని ప్రశ్నించారు. సినిమా డైలాగులు, రాజకీయ డ్రామాలు కాకుండా అభివృద్ధి, సంక్షేమమే తన లక్ష్యమని స్పష్టం చేశారు.
ఓవర్లోడ్ లారీలపై నిబంధనల ప్రకారం చర్యలు తీసుకోవాలని అధికారులకు గతంలోనే సూచించినట్లు తెలిపారు. ప్రజలు అమాయకులు కాదని, పనిచేసే ప్రభుత్వంపై తమ నిర్ణయాన్ని బ్యాలెట్ బాక్సులో చూపిస్తారని బోడే ప్రసాద్ అన్నారు.
