ఫీల్డ్ అసిస్టెంట్ల సమస్యలు పరిష్కరించాలి
బాడంగి, సెప్టెంబర్ 30 (మేజర్ న్యూస్): గ్రామీణ ఉపాధి హామీ పథకంలో పనిచేస్తున్న ఫీల్డ్ అసిస్టెంట్ల సమస్యలను ప్రభుత్వం వెంటనే పరిష్కరించాలని కోరుతూ మండల ప్రజాపరిషత్ అభివృద్ధి అధికారి శ్రీలతకు బుధవారం సిఐటియు నాయకులు శంకరరావు ఆధ్వర్యంలో మండలంలో గల పలువురు ఫీల్డ్ అసిస్టెంట్లు వినతిపత్రం సమర్పించారు.
గత 19 సంవత్సరాలుగా ఫీల్డ్ అసిస్టెంట్లు సేవలందిస్తున్నప్పటికీ ప్రస్తుతం నెలకు రూ.5,745 మాత్రమే వేతనం అందుతోందని, కుటుంబ పోషణకు ఇబ్బందులు ఎదురవుతున్నాయని పేర్కొన్నారు. కనీస వేతనాన్ని రూ.26 వేలకు పెంచాలని కోరారు. అలాగే ఉద్యోగ భద్రత కల్పించాలని, అర్హత ఉన్న ఫీల్డ్ అసిస్టెంట్లకు పదోన్నతులు కల్పించాలని, పెండింగ్లో ఉన్న వేతన బకాయిలను చెల్లించాలని డిమాండ్ చేశారు.
మూడు నెలలు పూర్తిచేసిన వారికి ఎఫ్టీఈ హోదా కల్పించాలని, ఉపాధి సిబ్బందికి వర్తింపజేస్తున్న మస్టర్ డే విధానం (7,500) రద్దు చేయాలని కోరారు. విధి నిర్వహణలో ప్రమాదవశాత్తు మరణించిన కుటుంబాలకు ఎక్స్గ్రేషియా రూ.25 లక్షలు చెల్లించాలని, కుటుంబంలో ఒకరికి ప్రభుత్వ ఉద్యోగం ఇవ్వాలని విజ్ఞప్తి చేశారు.
గ్రామీణ ప్రాంతాల్లో పనిచేస్తున్న ఫీల్డ్ అసిస్టెంట్లకు ఏపీఎస్ఆర్ఎల్ఎం కింద అలవెన్స్ కల్పించాలని, ఎన్ఎంఎంఎస్, భువన్ తదితర యాప్లతో పాటు కొత్తగా వచ్చిన మొబైల్ యాప్ల నుంచి ఫీల్డ్ అసిస్టెంట్లను మినహాయించాలని కోరారు. అలాగే క్యాష్లెస్ హెల్త్ కార్డులు ఇవ్వాలని విజ్ఞప్తి చేశారు. ప్రభుత్వం తమ సమస్యలను వెంటనే పరిష్కరించాలని, లేనిపక్షంలో రాష్ట్రవ్యాప్తంగా ఉద్యమాన్ని చేపడతామని సిఐటియు నాయకులు అన్నారు
