పట్టణాల్లో 30 యాక్ట్, 144 సెక్షన్ అమల్లో ఉంది. నిబంధనలు ఉల్లంఘిస్తే శిక్ష తప్పదు. జిల్లా ఎస్పీ.

కళ్యాణదుర్గం :-జిల్లాలో శాంతిభద్రతల పరిరక్షణకు పోలీసు శాఖ పటిష్ఠ చర్యలు చేపట్టింది. ఇందులో భాగంగా  కళ్యాణదుర్గం, రాయదుర్గం పట్టణాల్లో 30 పోలీస్ యాక్ట్, 144 సెక్షన్ అమల్లో ఉన్నాయని జిల్లా ఎస్పీ పి. జగదీష్ ఐపీఎస్ వెల్లడించారు. అమల్లో ఉన్న నిబంధనలకు అనుగుణంగా ప్రజలు వ్యవహరించాలని, ఎలాంటి అవాంఛనీయ ఘటనలకు తావివ్వకుండా పోలీసు శాఖకు సహకరించాలని సూచించారు. ముందస్తు అనుమతి లేకుండా ర్యాలీలు, ధర్నాలు, నిరసన కార్యక్రమాలు, బహిరంగ సభలు నిర్వహించడానికి అనుమతి లేదని స్పష్టం చేశారు. అలాగే ఐదుగురికి మించి గుమిగూడి శాంతిభద్రతలకు విఘాతం కలిగించే చర్యలకు పాల్పడరాదని హెచ్చరించారు. చట్ట నిబంధనలను ప్రతి ఒక్కరూ తప్పనిసరిగా పాటించాలని, ప్రజా శాంతికి భంగం కలిగించే విధంగా వ్యవహరించవద్దని పేర్కొన్నారు. రాజకీయ పార్టీలు, ప్రజాసంఘాలు, వివిధ సంస్థల నాయకులు తమ కార్యక్రమాలను నిర్వహించే ముందు సంబంధిత పోలీసు అధికారుల నుంచి అవసరమైన అనుమతులు పొందాలని సూచించారు. అనుమతులు లేకుండా ర్యాలీలు, సభలు, ధర్నాలు నిర్వహించడం ద్వారా ప్రజలకు ఇబ్బందులు కలగడంతో పాటు శాంతిభద్రతల సమస్యలు తలెత్తే అవకాశం ఉందని తెలిపారు. ఈ నేపథ్యంలో ప్రతి ఒక్కరూ బాధ్యతాయుతంగా వ్యవహరించాలని కోరారు. పోలీసు శాఖ విధించిన ఆంక్షలను ఉల్లంఘించి శాంతిభద్రతలకు విఘాతం కలిగించేందుకు ప్రయత్నించే వారిని ఉపేక్షించబోమని ఎస్పీ హెచ్చరించారు. చట్టాన్ని అతిక్రమించే వ్యక్తులపై నిబంధనల ప్రకారం కఠిన చర్యలు తీసుకుంటామని స్పష్టం చేశారు. ప్రజల భద్రత, ప్రశాంత వాతావరణం, సాధారణ జనజీవనానికి ఎలాంటి ఆటంకాలు కలగకుండా పోలీసు శాఖ నిరంతరం అప్రమత్తంగా ఉంటుందని పేర్కొన్నారు. జిల్లాలో శాంతియుత వాతావరణాన్ని కాపాడటం పోలీసుల బాధ్యత మాత్రమే కాదని, ప్రతి పౌరుడి బాధ్యత కూడా అని ఎస్పీ తెలిపారు. రాజకీయ పార్టీల నాయకులు, ప్రజాసంఘాల ప్రతినిధులు, యువత, ప్రజలు పోలీసు శాఖకు సహకరించాలని విజ్ఞప్తి చేశారు. ఎక్కడైనా అవాంఛనీయ ఘటనలు చోటుచేసుకునే అవకాశం ఉందని తెలిసినప్పుడు వెంటనే పోలీసులకు సమాచారం అందించాలని సూచించారు. చట్ట నిబంధనలను గౌరవిస్తూ ప్రజలందరూ సంయమనం పాటించాలని, జిల్లాలో శాంతిభద్రతల పరిరక్షణకు సహకరించాలని ఎస్పీ పి. జగదీష్ కోరారు.

కళ్యాణదుర్గం టౌన్ రిపోర్టర్ :-రంగస్వామి.