పశ్చిమాసియా సంక్షోభం వేళ బాగ్దాద్‌కు ఇరాన్ విదేశాంగ మంత్రి: ఓఐసీ అత్యవసర సదస్సులో పాల్గొననున్న అబ్బాస్ అరఘ్చీ..
సూర్య అంతర్జాతీయ వ్యవహారాల డెస్క్: పశ్చిమాసియాలో యుద్ధ ఉద్రిక్తతలు రోజురోజుకూ పారకాష్టకు చేరుతున్న తరుణంలో, ఇస్లామిక్ దేశాల మధ్య దౌత్య సమన్వయాన్ని బలోపేతం చేసేందుకు ఇరాన్ విదేశాంగ మంత్రి సయ్యద్ అబ్బాస్ అరఘ్చీ ఇరాక్ రాజధాని బాగ్దాద్‌కు బయలుదేరి వెళ్లారు. బాగ్దాద్ వేదికగా జరగనున్న ఆర్గనైజేషన్ ఆఫ్ ఇస్లామిక్ కోఆపరేషన్ (OIC) కౌన్సిల్ ఆఫ్ ఫారిన్ మినిస్టర్స్ అత్యవసర సదస్సులో ఆయన పాల్గొననున్నారు. ఇజ్రాయెల్ సైనిక దాడులు, గాజా మరియు లెబనాన్‌లో తీవ్రమవుతున్న సంక్షోభం, అలాగే హోర్ముజ్ జలసంధి పరిసరాల్లో నెలకొన్న భద్రతా పరిణామాల నేపథ్యంలో ఈ భేటీ అంతర్జాతీయంగా ప్రాధాన్యత సంతరించుకుంది.
ఇస్లామిక్ దేశాల ఉమ్మడి వైఖరిపై దృష్టి:
ఈ సదస్సులో భాగంగా అబ్బాస్ అరఘ్చీ ఇరాక్ విదేశాంగ మంత్రి ఫువాద్ హుస్సేన్‌తో పాటు పాకిస్తాన్, టర్కీ, ఈజిప్ట్ తదితర కీలక సభ్యదేశాల విదేశాంగ మంత్రులతో ద్వైపాక్షిక చర్చలు జరపనున్నారు. పశ్చిమాసియా ప్రాంతంలో శాంతిభద్రతలను కాపాడేందుకు, ఇజ్రాయెల్ దురాక్రమణలను అంతర్జాతీయ వేదికలపై సమష్టిగా ఎండగట్టేందుకు ముస్లిం ప్రపంచం ఏకతాటిపైకి రావాలని ఇరాన్ పిలుపునిస్తోంది. పాలస్తీనా, యెమన్ సంక్షోభాలపై బలమైన నిర్ణయాలు తీసుకోవడంతో పాటు సమావేశం ముగింపులో 'బాగ్దాద్ డిక్లరేషన్'ను ఆమోదించే దిశగా సన్నాహాలు జరుగుతున్నాయి.
ప్రాంతీయ శాంతి చర్చల పునరుద్ధరణకు యత్నాలు:
యుద్ధ విస్తరణను అడ్డుకోవడానికి, దౌత్య మార్గాల ద్వారా ఉద్రిక్తతలను తగ్గించడానికి తక్షణమే చర్చల వేదికను పునరుద్ధరించాలని ఇరాక్, ఇరాన్‌లు భావిస్తున్నాయి. అమెరికా, ఇజ్రాయెల్‌ల వైఖరిని ప్రతిఘటించేందుకు ఓఐసీ వేదికగా సభ్యదేశాల మధ్య ఆర్థిక, రక్షణపరమైన ఉమ్మడి కార్యాచరణను రూపొందించడమే అరఘ్చీ బాగ్దాద్ పర్యటన ప్రధాన లక్ష్యమని దౌత్య వర్గాలు వెల్లడించాయి.
