మృతి చెందిన జర్నలిస్టు కుటుంబాన్ని పరామర్శించిన ఎమ్మెల్యే పోచారం

సూర్య బాన్సువాడ: బాన్సువాడ పట్టణానికి చెందిన సీనియర్ జర్నలిస్టు యండమూరి వరప్రసాద్ (58) శనివారం మృతి చెందిన విషయం విదితమే. గత కొన్ని రోజులుగా అయన మూత్రపిండాల వ్యాధితో బాధపడుతూ హైదరాబాద్ లో చికిత్స పొందుతూ తుదిశ్వాస విడిచారు. ఆదివారం ఆయన పార్థివ దేహాన్ని బాన్సువాడ ఎమ్మెల్యే, రాష్ట్ర ప్రభుత్వ సలహాదారు పోచారం శ్రీనివాస్ రెడ్డి సందర్శించి పూలమాల వేసి ఘన నివాళులు అర్పించారు. కుటుంబ సభ్యులను ఓదార్చి, ధైర్యం చెప్పారు. ఈ సందర్భంగా ఎమ్మెల్యే పోచారం మాట్లాడుతూ, జర్నలిస్టు వరప్రసాద్ బాన్సువాడ ప్రాంతంలో ఎన్నో ఏళ్లుగా వివిధ సమస్యలపై వార్తలు రాస్తూ ప్రజల పక్షాన నిలిచారని కొనియాడారు. సాక్షి, ఆంధ్రజ్యోతి, సూర్య పత్రికల్లో పనిచేసి తనదైన ముద్ర వేశారని అన్నారు. ఆయన మృతి పట్ల తీవ్ర విచారం వ్యక్తం చేశారు. ప్రసాద్ మృతి బాన్సువాడ జర్నలిజానికి తీరని లోటని, ఆయన కుటుంబానికి అన్ని విధాలుగా అండగా ఉంటామని ఎమ్మెల్యే హామీ ఇచ్చారు.. కుటుంబానికి ఆర్థిక సహాయం పింఛన్, ఉద్యోగం హామీ
మృతుని కుటుంబానికి సహాయం అందించేందుకు ఎమ్మెల్యే పోచారం వెంటనే మీడియా అకాడమీ చైర్మన్ శ్రీనివాస్ రెడ్డితో ఫోన్లో మాట్లాడారు. ప్రసాద్ కుటుంబానికి ఆర్థికంగా చేయూత ఇవ్వాలని కోరారు. దీనికి స్పందించిన చైర్మన్ శ్రీనివాస్ రెడ్డి, ఐదేళ్ల పాటు నెలకు రూ.3 వేల చొప్పున పింఛన్, అలాగే జర్నలిస్ట్ వెల్ఫేర్ ఫండ్ నుంచి నిధులు మంజూరు చేస్తామని హామీ ఇచ్చినట్లు ఎమ్మెల్యే తెలిపారు.అంతేకాకుండా ఎమ్మెల్యే పోచారం స్వయంగా ప్రసాద్ కుటుంబానికి ఆర్థిక సహాయం అందజేశారు. వారి కుటుంబంలో ఒకరికి అవుట్ సోర్సింగ్ ద్వారా ఉద్యోగం ఇప్పిస్తామని హామీ ఇచ్చారు... పలువురు నేతలు, జర్నలిస్టులు నివాళి
వరప్రసాద్ పార్థివ దేహాన్ని టీయూడబ్ల్యూజే (ఐజేయూ) జిల్లా అధ్యక్షులు రజనీకాంత్, కార్యదర్శి తోట రాజేష్ సందర్శించి నివాళులు అర్పించారు. కుటుంబానికి అండగా ఉంటామని వారు హామీ ఇచ్చారు. అలాగే బీఆర్ఎస్ నేత అంజిరెడ్డి, కాంగ్రెస్ నేత గురువినయ్ కుమార్, బస్వారాజ్ తదితరులు పరామర్శించి కుటుంబ సభ్యులకు ధైర్యం చెప్పారు. వివిధ పార్టీల నాయకులు, అధికారులు, జర్నలిస్టులు పెద్ద సంఖ్యలో హాజరై నివాళులు అర్పించారు. వరప్రసాద్ మృతితో కుటుంబం శోకసంద్రంలో మునిగిపోయింది. ఆయన పవిత్ర ఆత్మకు శాంతి కలగాలని, కుటుంబ సభ్యులకు ఈ విషాదాన్ని తట్టుకునే శక్తిని భగవంతుడు ప్రసాదించాలని అందరూ ప్రార్థించారు.