ఓటు హక్కు వినియోగించుకున్న తెదేపా రాష్ట్ర అధ్యక్షుడు పల్లా శ్రీనివాసరావు

గాజువాక, సూర్య : తెదేపా రాష్ట్ర అధ్యక్షుడు, గాజువాక ఎమ్మెల్యే పల్లా శ్రీనివాసరావు తన ఓటు హక్కును వినియోగించుకున్నారు. గాజువాక హైస్కూల్ రోడ్డులోని మండల పరిషత్ పాఠశాలలో ఏర్పాటు చేసిన పోలింగ్ కేంద్రానికి చేరుకున్న ఆయన.. ఓటు వేసి ప్రజాస్వామ్య బాధ్యతను నిర్వర్తించారు. అనంతరం పోలింగ్ కేంద్రం వెలుపల పల్లా శ్రీనివాసరావు మీడియాతో మాట్లాడుతూ.. ఈ ఎన్నికల్లో కూటమి అభ్యర్థులందరూ అఖండ మెజారిటీతో ఘనవిజయం సాధిస్తారని, మేయర్ పీఠాన్ని కూటమి కైవసం చేసుకోవడం ఖాయమని ధీమా వ్యక్తం చేశారు. ప్రజాస్వామ్య క్షేత్రంలో ప్రజలు ప్రతి విషయాన్నీ ఎంతో నిశితంగా గమనిస్తున్నారని, మంచి చెడులను ఆలోచించి సరైన తీర్పునిస్తారని తెలిపారు. యువత బంగారు భవిష్యత్తుకు, రాష్ట్ర సమగ్ర వికాసానికి ఓటు హక్కే అసలైన నాంది అని ఆయన పేర్కొన్నారు. రాష్ట్ర ప్రగతిని, భవిష్యత్తు తరాల ఆకాంక్షలను దృష్టిలో ఉంచుకుని ప్రజలంతా కూటమి వైపే మొగ్గు చూపుతున్నారని, వారి సంపూర్ణ మద్దతుతో కూటమి అభ్యర్థులు తప్పకుండా గెలుపొందుతారని పల్లా శ్రీనివాసరావు ఆశాభావం వ్యక్తం చేశారు.