ఓటర్ల ఇంటింటికీ ఓటర్ స్లిప్పుల పంపిణీ : కమిషనర్ వై.ఓ. నందన్

నెల్లూరు, మేజర్ న్యూస్ :   నెల్లూరు నగరపాలక సంస్థ పరిధిలో నవంబర్ 1వ తేదీన జరగనున్న రెండవ సాధారణ ఎన్నికలకు సంబంధించి ఓటర్లను చైతన్యవంతులను చేసేందుకు అధికారులు చర్యలు చేపట్టారు. ఇందులో భాగంగా బూత్ లెవల్ అధికారులు ఇంటింటికీ వెళ్లి ఓటర్ల వివరాలతో కూడిన ఓటర్ స్లిప్పులను పంపిణీ చేస్తున్నారు.  ఈ విషయాన్ని నగరపాలక సంస్థ కమిషనర్, అదనపు ఎన్నికల అధికారి వై.ఓ. నందన్ ఒక ప్రకటనలో వెల్లడించారు. నగర పరిధిలోని ఓటర్లందరూ ఎన్నికల్లో పాల్గొనేలా, ఓటు వేసేందుకు అవసరమైన వివరాలను సులభంగా తెలుసుకునేలా ఈ స్లిప్పులను అందజేస్తున్నట్లు తెలిపారు.  అధికారులు, బూత్ లెవల్ అధికారులు ఇంటికి వచ్చినప్పుడు నగర ప్రజలు తమ ఓటర్ వివరాలతో కూడిన స్లిప్పులను స్వీకరించాలని ఆయన సూచించారు. నవంబర్ 1న జరిగే సాధారణ ఎన్నికల్లో అర్హులైన ఓటర్లందరూ పాల్గొని తమ ఓటు హక్కును వినియోగించుకోవాలని కోరారు.  ప్రజాస్వామ్య పరిరక్షణలో ప్రతి పౌరుడి భాగస్వామ్యం కీలకమని, ఎన్నికల ప్రక్రియలో ప్రజలందరూ చురుకుగా పాల్గొనాలని కమిషనర్ వై.ఓ. నందన్ పిలుపునిచ్చారు.