మునిసిపల్ ఎన్నికలపై జిల్లా ఎస్పీ సమీక్ష

నేటి దినపత్రిక సూర్య బ్యూరో రాజమహేంద్రవరం తూర్పుగోదావరి జిల్లా ఎస్పీ డి నరసింహ కిషోర్ జిల్లాలో నవంబర్ 1న జరగబోయే మండపేట ,నిడదవోలు మరియు కొవ్వూరు  మున్సిపాలిటీలలో ఉన్న పోలింగ్ కేంద్రాలను, స్ట్రాంగ్ రూములను సందర్శించి అచ్చట భద్రతా ఏర్పాట్లను పర్యవేక్షించారు .అనంతరం పోలీస్ అధికారులతో సమీక్ష నిర్వహించారు. ఈ కార్యక్రమంలో ఎస్పీ తో పాటు అదనపు ఎస్పీ (అడ్మిన్) దేవరాజ్ పాటిల్ మనీష్ , డీఎస్పీలు ఇతర పోలీసు అధికారులు పాల్గొన్నారు.మున్సిపల్ ఎన్నికలను అత్యంత ప్రశాంత వాతావరణంలో, స్వేచ్ఛగా, పారదర్శకంగా  నిష్పక్షపాతంగా నిర్వహించేందుకు పోలీస్ శాఖ సర్వసన్నద్ధంగా ఉందని  తెలిపారు.  ఎన్నికలు జరిగే ప్రాంతాల్లో ఎలాంటి అవాంఛనీయ సంఘటనలకు తావులేకుండా అధిక సంఖ్యలో సాయుధ పోలీసు బలగాలతో ఫ్లాగ్ మార్చ్లు (కవాతులు) నిర్వహిస్తున్నట్లు ఆయన పేర్కొన్నారు.ఎన్నికలు జరిగే మున్సిపాలిటీల  పరిధిలో కఠిన నిషేధాజ్ఞలు అమల్లో ఉంటాయన్నారు. పోలింగ్ కేంద్రాల పరిసరాల్లో అనవసరంగా గుమిగూడడం, ఐదుగురికి మించి గుంపులుగా తిరగడం పూర్తిగా నిషేధమన్నారు.

 ఓటర్లను ప్రభావితం చేసేందుకు నగదు, మద్యం, విలువైన బహుమతులు  ఇతర ప్రలోభపెట్టే వస్తువులను పంపిణీ చేయడం చట్టరీత్యా నేరం. ఇటువంటి చర్యలకు పాల్పడే వారిపై కఠిన చట్టపరమైన చర్యలు తీసుకుంటామన్నారు.

ఓటర్లను ఎవరైనా బెదిరించినా, భయపెట్టినా  వారి స్వేచ్ఛగా ఓటు హక్కును వినియోగించుకోకుండా అడ్డుకున్నా తక్షణమే కఠిన చర్యలు ఉంటాయి. ప్రజలు ఎలాంటి ప్రలోభాలకు, బెదిరింపులకు లొంగకుండా నిర్భయంగా, స్వేచ్ఛగా తమ ఓటు హక్కును వినియోగించు కోవాలన్నారు.ఎన్నికల్లో శాంతిభద్రతలకు విఘాతం కలిగించే సమస్యాత్మక వ్యక్తులు, రౌడీషీటర్లు  బయటి ప్రాంతాల వ్యక్తుల కదలికలపై నిరంతరం ప్రత్యేక నిఘా ఉంచినట్లు తెలిపారు. ప్రజాస్వామ్య బద్ధంగా జరిగే ఈ ఎన్నికలను విజయవంతం చేయడానికి ప్రతి ఒక్కరూ పోలీసు శాఖకు సహకరించాలని, శాంతిభద్రతల పరిరక్షణకు ప్రజల భాగస్వామ్యం ఎంతో కీలకమని ఎస్పీ  డి. నరసింహ కిషోర్  పిలుపునిచ్చారు