నెల్లూరు వెళ్లాలంటే నిలబడాల్సిందే..!

మర్రిపాడు మేజర్ న్యూస్ :   జిల్లా సరిహద్దు ప్రాంతమైన మర్రిపాడు మండలంలోని ప్రజలు నెల్లూరు- ముంబై జాతీయ రహదారిపై వెళ్లేటటువంటి ఆర్టీసీ బస్సుల్లో  ప్రయాణించాలంటే హడలెత్తిపోతున్నారు. అటు కడపకు ఇటు నెల్లూరుకు సెంటర్ పాయింట్ మర్రిపాడు మండల కేంద్రం. ఈ తరుణంలో కడప నుంచి గాని నెల్లూరు నుంచి గాని వచ్చే బస్సులు ప్రయాణికులతో కిక్కిరిసి మర్రిపాడు మండలాన్ని తాకుతున్నాయి. దీంతో ఆర్టీసీ బస్సుల్లో మర్రిపాడు మండల ప్రజలు నిలబడి ప్రయాణించాల్సిన పరిస్థితి ఏర్పడింది. నెల్లూరుకు వెళ్లే బస్సుల్లో కడప, బద్వేల్ ప్రాంతాలకు వచ్చేసరికి సీట్లు నిండిపోతున్నాయి. దీంతో మర్రిపాడు మండల ప్రజలు నెల్లూరుకు వెళ్లాలంటే 80 కిలోమీటర్ల పైనే నిలబడి ప్రయాణించాల్సిన పరిస్థితి ఏర్పడింది. దీంతోపాటుగా వృద్ధులు పరిస్థితి అయితే మరి దయనీయం. గతంలో ఈ పరిస్థితి లేకపోయినప్పటికీ మహిళలకు శ్రీ శక్తి పథకం అమలులోకి వచ్చినప్పటి నుంచి తిప్పలు తప్పడం లేదని ప్రయాణికులు వాపోతున్నారు. కనీసం నెల్లూరు - ముంబై జాతీయ రహదారిపై ప్రయాణించే కడప, బద్వేల్, పొద్దుటూరు, అనంతపురం, కర్నూల్, బస్సు సర్వీసులతోపాటుగా మరో అదనపు బస్సులు ఏర్పాటు చేస్తే గాని సమస్య పరిష్కారం కాదని మండల ప్రజలు అభిప్రాయం వ్యక్తం చేస్తున్నారు. ఈ జాతీయ రహదారిపై ప్రయాణించే బస్సులు ప్రారంభ దశలో ఉండే స్టేజీల వద్దనే నిండిపోతుండడంతో ప్రధాన కూడలిలో కూడా ఆగకపోతుండడంతో ప్రయాణికులు తీవ్ర ఇబ్బందులు ఎదుర్కొంటున్నారు. అటు కడపకు గాని ఇటు నెల్లూరుకు గాని 80 కిలోమీటర్ల పైనే ఉండడంతో నిలుచొని ప్రయాణించాలంటే నరకయాతన అనుభవిస్తున్నారు. ఇప్పటికైనా సంబంధిత అధికారులు, పాలకులు పట్టించుకోని ఆర్టీసీ బస్సుల సర్వీసులను పెంచే విధంగా చర్యలు తీసుకోవాలని పలువురు కోరుతున్నారు.