నిరసన తెలపడం రాజ్యాంగ హక్కు - ఢిల్లీ అరెస్టులను ఖండించండి

పలాస, సూర్య : విద్యార్థి, యువజనులపై ఢిల్లీ పోలీసుల అక్రమ అరెస్టులను ఖండించాలని సీపీఐ(ఎంఎల్) లిబరేషన్ పిలుపునిచ్చింది.పలాస మండలం కోసంగిపురం జంక్షన్ లోని సీపీఐ(ఎంఎల్) కార్యాలయంలో శనివారం ఏర్పాటు చేసిన పత్రికా సమావేశంలో రాష్ట్ర నాయకులు తామాడ సన్యాసిరావు, మద్దిల రామారావు మాట్లాడారు.జంతర్ మంతర్ ధర్నాను విజయవంతం చేసిన యువతకు ధన్యవాదాలు తెలిపారు. దేశవ్యాప్తంగా అనేక ఆటంకాలు సృష్టించి 17 రైళ్లు, మెట్రో సేవలు రద్దు చేసి ఢిల్లీ చేరుకోకుండా మోదీ ప్రభుత్వం అడ్డుకుందని విమర్శించారు. నిరసన తెలపడం రాజ్యాంగం ఇచ్చిన హక్కుని, దాన్ని కాలరాయడం దుర్మార్గమని అన్నారు.చీఫ్ ఎలక్షన్ కమిషనర్ జ్ఞానేష్ కుమార్ రాజీనామా చేయాలని, ఫారం-6 రద్దు, సర్ ప్రక్రియల ద్వారా 13 కోట్ల ఓటర్ల తొలగింపును వెంటనే నిలిపివేసి తొలగించిన ఓట్లను తిరిగి జాబితాలో చేర్చిన తర్వాతే ఎన్నికలు నిర్వహించాలని డిమాండ్ చేశారు.ఈ సమావేశంలో జిల్లా నాయకులు కుత్తుం లోకనాథం, ఏఐసీసీటీయూ జిల్లా నాయకులు కుత్తుం దుష్యంత్ రావు, పిన్నింటి నాగేశ్వరరావు, రైతు నాయకులు పొత్నంపల్లి అప్పారావు, ఆర్వైఏ జిల్లా నాయకులు మద్దిల కైలాస్, మద్దిల నారాయణ తదితరులు పాల్గొన్నారు.

రిపోర్టర్ : విశ్వేశ్వర, పలాస, శ్రీకాకుళం జిల్లా.