telanagana
శరన్నవరాత్రి ఉత్సవాలకు ముస్తాబైన మామిండ్ల ముత్యాలు యాదవ్ మండపం
ఘట్కేసర్, మేజర్ న్యూస్(అక్టోబర్, 10): శ్రీశ్రీ దేవీ శరన్నవరాత్రి మహోత్సవాలను పురస్కరించుకొని ఘట్కేసర్ లోని మహంకాళి దేవాలయం పక్కన అమ్మవారి ప్రతిష్ఠాపనకు ఏర్పాట్లు పూర్తయ్యాయి. మామిండ్ల ముత్యాలు యాదవ్, కార్తీక్ యాదవ్ ఆధ్వర్యంలో మండపాన్ని సర్వాంగసుందరంగా తీర్చిదిద్దారు. మండపం పైభాగంలో కొండలు, జలపాతాలు, పచ్చని వృక్షాలు, కమల పుష్పాల మధ్య శ్రీ వేంకటేశ్వర స్వామివారి రూపాన్ని రంగురంగుల విద్యుద్దీపాలతో రూపొందించారు. బంగారు వర్ణపు కాంతులతో స్వామివారి రూపం, నీలిరంగు కొండల నేపథ్యం ప్రత్యేక ఆకర్షణగా నిలుస్తున్నాయి. మరోవైపు, ఎదులాబాద్ రోడ్డులో ఏర్పాటు చేసిన భారీ లైటింగ్ కమాన్లు చూపరులను ఆకట్టుకుంటున్నాయి. కమాన్లకు ఇరువైపులా వివిధ రంగుల దీపాలతో అలంకరించగా, పైభాగంలో రాధాకృష్ణుల రూపాన్ని విద్యుద్దీపాలతో తీర్చిదిద్దారు. అమ్మవారిని దర్శించుకొని అమ్మవారి కృపకు పాత్రులు కావాలని నిర్వాహకులు మామిండ్ల ముత్యాలు యాదవ్, కార్తీక్ యాదవ్ కోరారు. ఉత్సవాల నిర్వహణకు అవసరమైన సర్వ ఏర్పాట్లను నిర్వాహకులు పూర్తి చేశారు.
రిపోర్టర్: గుర్రం రమేష్, ఘట్కేసర్, మేడ్చల్ జిల్లా.
