నేడు, రేపు విశాఖలో 31వ సీఐఐ పార్ట్‌నర్‌షిప్ సమ్మిట్

విశాఖపట్నం: రాష్ట్రంలో పెట్టుబడుల ఆకర్షణే లక్ష్యంగా ప్రతిష్టాత్మక 31వ సీఐఐ (CII) పార్ట్‌నర్‌షిప్ సమ్మిట్‌కు విశాఖపట్నం వేదికైంది. నగరంలోని ఆంధ్రా యూనివర్సిటీ (ఏయూ) ఇంజినీరింగ్ కళాశాల మైదానంలో నేడు, రేపు (ఈ నెల 12, 13 తేదీల్లో) ఈ సదస్సు జరగనుంది. ఈ అంతర్జాతీయ సదస్సుకు 59 దేశాల నుంచి 15 మంది మంత్రులతో పాటు సుమారు 1,250 మంది ప్రముఖ పారిశ్రామికవేత్తలు హాజరుకానున్నారు. సదస్సు ముగింపు వేడుకలకు భారత ఉపరాష్ట్రపతి ముఖ్య అతిథిగా విచ్చేయనున్నారు. ప్రముఖుల రాక నేపథ్యంలో సదస్సు ప్రాంగణం వద్ద 2,700 మంది పోలీసులతో పటిష్టమైన బందోబస్తు ఏర్పాటు చేశారు. వాహనాల రద్దీని నియంత్రించేందుకు 12 ప్రత్యేక పార్కింగ్ ప్రాంతాలను అధికారులు సిద్ధం చేశారు.