నేడు షెడ్యూల్ విడుదల చేయనున్న ఎస్ఈసీ

అమరావతి: ఆంధ్రప్రదేశ్‌లో పెండింగ్‌లో ఉన్న 23 పట్టణ స్థానిక సంస్థల ఎన్నికల నిర్వహణకు రాష్ట్ర ఎన్నికల సంఘం (SEC) రంగం సిద్ధం చేసింది. ఈ ఎన్నికలకు సంబంధించిన షెడ్యూల్‌ను నేడు మధ్యాహ్నం 12:30 గంటలకు రాష్ట్ర ఎన్నికల కమిషనర్ అనిల్ చంద్ర పునేఠా అధికారికంగా విడుదల చేయనున్నారు.

న్యాయపరమైన చిక్కులు, వివాదాలు తొలగిపోవడంతో పాటు వార్డుల పునర్విభజన, రిజర్వేషన్ల ప్రక్రియ పూర్తి కావడంతో ఈ ఎన్నికలను నిర్వహిస్తున్నారు. వీటిలో శ్రీకాకుళం, కాకినాడ, రాజమహేంద్రవరం, మంగళగిరి-తాడేపల్లి నగర పాలక సంస్థలతో పాటు మరో 19 పురపాలక సంఘాలు (మున్సిపాలిటీలు) ఉన్నాయి. వీటిలో ఆమదాలవలస, రాజాం, భీమవరం, తణుకు, తాడేపల్లిగూడెం, పాలకొల్లు, చింతలపూడి, గుడివాడ, తాడిగడప, పొన్నూరు, బాపట్ల, నరసరావుపేట, పొదిలి, కందుకూరు, కావలి, అల్లూరు, గూడూరు, శ్రీకాళహస్తి, బి. కొత్తకోట మున్సిపాలిటీలు ఉన్నాయి. ఈ నెల 26వ తేదీన పోలింగ్ నిర్వహించేందుకు ఎన్నికల సంఘం కసరత్తు చేస్తోంది.