నర్సరావుపేటలో MPTC, ZPTC ఎన్నికల బహిష్కరణ

నరసరావుపేట :పల్నాడు జిల్లా నర్సరావుపేట నియోజకవర్గంలో ఎంపీటీసీ, జెడ్పీటీసీ ఎన్నికలను వైఎస్సార్‌సీపీ బహిష్కరిస్తున్నట్లు ఆ పార్టీ మాజీ ఎమ్మెల్యే గోపిరెడ్డి శ్రీనివాస రెడ్డి వెల్లడించారు. నామినేషన్ల ప్రక్రియకు పూర్తిస్థాయి రక్షణ కల్పిస్తామని పోలీసులు ఇచ్చిన హామీని నిలబెట్టుకోలేకపోయారని ఆయన తీవ్ర ఆరోపణలు చేశారు. గత మూడు రోజులుగా పోలీసుల భద్రత కోసం వేచి చూసినప్పటికీ నిరాశే ఎదురైందని, చివరకు నామినేషన్ గడువు ముగిసే సమయానికి పోలీసులు కేంద్రాల వద్దకు వచ్చారని తెలిపారు.

రెండు మండలాల్లో నామినేషన్లు వేసేందుకు అనుమతి కోరగా, కేవలం రొంపిచర్ల మండలానికి మాత్రమే అనుమతించారని ఆవేదన వ్యక్తం చేశారు. నామినేషన్ కేంద్రాల వద్ద సుమారు రెండు వేల మంది వరకు టీడీపీ కార్యకర్తలు మోహరించారని పేర్కొన్నారు. ఇటువంటి ఉద్రిక్త పరిస్థితుల్లో తమ పార్టీ మహిళా అభ్యర్థుల భద్రతను ప్రమాదంలో పడేయడం ఇష్టం లేకే ఈ ఎన్నికల బహిష్కరణ నిర్ణయం తీసుకున్నట్లు మాజీ ఎమ్మెల్యే స్పష్టం చేశారు.