నామినేషన్ కేంద్రాన్ని తనిఖీ చేసిన డిఎస్పి.

ముత్తుకూరు మేజర్ న్యూస్ :   ముత్తుకూరు మండల కేంద్రంలో ఎంపీటీసీ ఎన్నికల నామినేషన్ కేంద్రాన్ని నెల్లూరు రూరల్ డీఎస్పీ జి. శ్రీనివాసరావు బుధవారం తనిఖీ చేశారు. ఈ సందర్భంగా ఎన్నికల రిటర్నింగ్ అధికారి రమేష్ బాబుతో ఆయన మాట్లాడి నామినేషన్ల స్వీకరణ ప్రక్రియ గురించి వివరాలు అడిగి తెలుసుకున్నారు. నామినేషన్ల స్వీకరణ సందర్భంగా అనుసరిస్తున్న విధానాలు, కేంద్రంలో చేపట్టిన ఏర్పాట్లు, ఎన్నికల నిర్వహణకు సంబంధించి అధికారుల సన్నద్ధతపై చర్చించారు. అలాగే నామినేషన్ కేంద్రం వద్ద పోలీస్ శాఖ తరఫున ఏర్పాటు చేసిన బందోబస్తు, భద్రతా చర్యలపై సమీక్షించారు. ఎన్నికల ప్రక్రియ ప్రశాంతంగా, సజావుగా జరిగేలా అవసరమైన భద్రతా ఏర్పాట్లపై అధికారులతో చర్చించినట్లు తెలిపారు. ఈ తనిఖీలో స్థానిక ఎస్సైలు కొండారెడ్డి, జేపీ శ్రీనివాసరెడ్డి తదితరులు పాల్గొన్నారు.