మంగళగిరి నియోజకవర్గం మెల్లెంపూడిలో గ్యార్మీ షరీఫ్ ఉత్సవాలు

గ్యార్మీ గంధ మహోత్సవంలో పాల్గొన్న మంత్రి నారా లోకేష్

సూర్య స్టేట్ బ్యూరో, అమరావతి : 

సూఫీ ఆధ్యాత్మిక గురువు హజ్రత్‌ షేక్‌ అబ్దుల్‌ ఖాదిర్‌ జిలానీని స్మరించే పవిత్ర ఉత్సవం గ్యార్మీ షరీఫ్‌ పండుగను మంగళగిరి నియోజకవర్గం తాడేపల్లి మండలం మెల్లెంపూడి గ్రామంలో ముస్లింలు అత్యంత భక్తిశ్రద్ధలతో నిర్వహించారు. ఈ గ్యార్మీ గంధ మహోత్సవాల్లో విద్య, ఐటీ శాఖల మంత్రి నారా లోకేష్ పాల్గొన్నారు. ముస్లిం సోదర సోదరీమణులతో కలిసి ప్రత్యేక దువాలో లోకేష్ పాల్గొన్నారు. ఈ సందర్భంగా మంత్రి మాట్లాడుతూ.. ఖాదిర్ బోధనలు ప్రతి ఒక్కరికీ అనుసరణీయమన్నారు. ఆధ్యాత్మిక చింతనను పండుగ ప్రబోధిస్తుందని.. మత సామరస్యం, సోదరభావానికి గ్యార్మీ లాంటి పండుగలు ప్రతీకగా నిలుస్తాయని చెప్పారు. ఈ కార్యక్రమంలో మెల్లెంపూడి గ్రామ టీడీపీ అధ్యక్షుడు షేక్ ఖాశీంబాబు, బొమ్మారెడ్డి కోటిరెడ్డి, పఠాన్ ఖాశీంఖాన్, తాడేపల్లి రూరల్ అధ్యక్షుడు దాసరి కృష్ణ, హజరత్ మహబూబ్ సుభాని కమిటీ సభ్యులు, కూటమి నాయకులు, కార్యకర్తలు, గ్రామ ప్రజలు పాల్గొన్నారు.