మహేంద్ర తనయ ఉద్ధృతి.. రహదారులపైకి వరద నీరు

కోసమాల వద్ద నాలుగు అడుగుల మేర ప్రవాహం.. రాకపోకల నియంత్రణకు బారికేడ్లు

మెళియాపుట్టి. అక్టోబర్ 29. మేజర్ న్యూస్.
ఆర్నబ్ తుపాను ప్రభావంతో కురుస్తున్న భారీ వర్షాలకు మెళియాపుట్టి మండలంలో మహేంద్ర తనయ నది ఉద్ధృతంగా ప్రవహిస్తోంది. కోసమాల, రట్టిని గ్రామాల సమీపంలో నది నీటిమట్టం పెరగడంతో రహదారులపైకి వరద నీరు చేరింది. కోసమాల వద్ద రహదారిపై సుమారు నాలుగు అడుగుల మేర నీరు ప్రవహిస్తుండగా, రట్టిని వద్ద కూడా రహదారిపైకి నీరు చేరింది. దీంతో ఆయా మార్గాల్లో రాకపోకలకు అంతరాయం ఏర్పడింది.
వరద ప్రవాహం పెరుగుతున్న నేపథ్యంలో ప్రమాదాల నివారణకు అధికారులు అప్రమత్తమయ్యారు. కోసమాల, రట్టిని గ్రామాల వద్ద రహదారులకు ఇరువైపులా బారికేడ్లు ఏర్పాటు చేశారు. వాహనదారులు, ప్రజలు వరద నీటిని దాటి వెళ్లకుండా రాకపోకలను నియంత్రించేందుకు రెండు ప్రాంతాల్లో వీఆర్వోలు, వీఆర్ఏలు, పోలీసు సిబ్బందిని నియమించారు. నది ప్రవాహాన్ని ఎప్పటికప్పుడు పరిశీలిస్తూ ప్రజలకు అందుబాటులో ఉండాలని సిబ్బందికి సూచించారు. ముఖ్యంగా రహదారులపై వరద నీరు ప్రవహిస్తున్న ప్రాంతాలలో ప్రయాణం చేయకుండా ప్రత్యామ్నాయ మార్గాలను ఎంచుకోవాలని సూచించారు
పరిస్థితిని సీఐ వెంకటరావు, తహసీల్దార్ రాము, ఎంపీడీవో పి.నరసింహప్రసాద్, డిప్యూటీ ఎంపీడీవో బి.అప్పయ్య, ఎస్సై ఆలీతో పాటు  అధికారులు పర్యవేక్షిస్తున్నారు