మధుమేహ నియంత్రణకు ముందస్తు పరీక్షలే కీలకం: నారాయణ వైద్యులు

నెల్లూరు కల్చరల్, మేజర్ న్యూస్ :   ప్రపంచ మధుమేహ దినోత్సవాన్ని పురస్కరించుకుని నెల్లూరు నారాయణ మెడికల్ కాలేజ్ హాస్పిటల్ ఆధ్వర్యంలో శనివారం మధుమేహ వ్యాధిపై అవగాహన కార్యక్రమం నిర్వహించారు. ఈ సందర్భంగా వైద్య నిపుణులు మధుమేహ నివారణ, ముందస్తు గుర్తింపు, చికిత్సా విధానాలు, తలెత్తే ఆరోగ్య సమస్యలపై వివరించారు. కార్యక్రమంలో భాగంగా నారాయణ కాంప్రహెన్సివ్ డయాబెటిస్ కేర్ ప్యాకేజీ పోస్టర్‌ను ఆవిష్కరించారు. హాస్పిటల్ మెడికల్ సూపరింటెండెంట్ డాక్టర్ ఆర్. ప్రభావతి మాట్లాడుతూ మధుమేహాన్ని ప్రారంభ దశలోనే గుర్తించి తగిన పరీక్షలు చేయించుకోవడం ద్వారా భవిష్యత్తులో ఎదురయ్యే ఆరోగ్య సమస్యలను నివారించవచ్చని తెలిపారు. సమగ్ర మధుమేహ పరీక్షల ప్యాకేజీలో ఈసీజీ, ఫాస్టింగ్, పోస్ట్ ప్రాండియల్ బ్లడ్ షుగర్, కిడ్నీ పరీక్షలు, లిపిడ్ ప్రొఫైల్, యూరిన్ మైక్రో ఆల్బుమిన్ , బీపీ, బాడీ మాస్ ఇండెక్స్ , పాదాల పరీక్ష, నరాల పనితీరు, హెచ్బిఎ1సి,  ఏబీపిఐ పరీక్షలతో పాటు వైద్య నిపుణుల సంప్రదింపు సదుపాయాలు అందుబాటులో ఉన్నాయని వివరించారు.
ఎండోక్రైనాలజీ విభాగాధిపతి డాక్టర్ టి. సునంద మాట్లాడుతూ 2026 ప్రపంచ మధుమేహ దినోత్సవ థీమ్ మధుమేహంపై ముందస్తు చర్యలు అని వెల్లడించారు. అధిక దాహం, తరచుగా మూత్ర విసర్జన, ఆకలి పెరగడం, అలసట, బరువు తగ్గడం, చూపు మందగించడం వంటి లక్షణాలు కనిపిస్తే నిర్లక్ష్యం చేయకుండా వైద్యులను సంప్రదించాలని సూచించారు.
కన్సల్టెంట్ ఎండోక్రైనాలజిస్ట్ డాక్టర్ జెడ్. సిద్ధునిఖిత్ మాట్లాడుతూ క్రమం తప్పకుండా షుగర్ పరీక్షలు చేయించుకోవడం, వైద్యులు సూచించిన మందులు వాడటం, వ్యాయామం, ఆహార నియమాలు పాటించడం ద్వారా మధుమేహాన్ని సమర్థవంతంగా నియంత్రించుకోవచ్చని చెప్పారు. జనరల్ సర్జరీ విభాగాధిపతి డాక్టర్ వి. మహీధర్ రెడ్డి మాట్లాడుతూ మధుమేహ బాధితుల్లో పాదాలకు గాయాలైతే త్వరగా మానకపోవడం, ఇన్ఫెక్షన్లు రావడం వంటి సమస్యలు ఉంటాయని, రోజూ పాదాలను పరిశీలించుకోవాలని సూచించారు.
జనరల్ మెడిసిన్ విభాగాధిపతి డాక్టర్ చంద్రబాబు మాట్లాడుతూ మధుమేహం దీర్ఘకాలం నియంత్రణలో లేకపోతే గుండె, మూత్రపిండాలు, కళ్ళు, నరాలపై తీవ్ర ప్రభావం చూపుతుందని హెచ్చరించారు. డైటీషియన్ ఎం. పద్మజ మదన్ మాట్లాడుతూ మధుమేహ బాధితులు సమతుల ఆహారం తీసుకోవాలని, చక్కెర పదార్థాలు, అధిక కేలరీల ఆహారాన్ని పరిమితం చేయాలని సూచించారు.
నారాయణ కాంప్రహెన్సివ్ డయాబెటిస్ కేర్ ప్యాకేజీ నవంబర్ 14 నుంచి డిసెంబర్ 14, 2026 వరకు అందుబాటులో ఉంటుందని తెలిపారు. కార్యక్రమంలో నారాయణ హాస్పిటల్ ఏజీఎం ఎ.సి. శేఖర్ రెడ్డి, వివిధ విభాగాల వైద్యులు, సిబ్బంది పాల్గొన్నారు.