మాతృభాషపై మమకారం పెంచుకోవాలి
సత్తెనపల్లి, మేజర్ న్యూస్ : తెలుగు భాషపై ప్రతి ఒక్కరూ మమకారం పెంచుకోవాలని, మాతృభాషలోని మాధుర్యాన్ని, కవిత్వంలోని గొప్పతనాన్ని విద్యార్థులు అర్థం చేసుకొని సాహిత్యంపై ఆసక్తి పెంచుకోవాలని విశ్రాంత తెలుగు పండితులు, కవి, ప్రవచనకర్త మంచి కంటి వేంకటేశ్వరరావు అన్నారు. భాష అనేది భావాలను వ్యక్తపరిచే సాధనం మాత్రమే కాదని, మన సంస్కృతి, సంప్రదాయాలకు ప్రతిబింబమని పేర్కొన్నారు.59వ జాతీయ గ్రంథాలయ వారోత్సవాల్లో భాగంగా మంగళవారం శాఖా గ్రంథాలయంలో తెలుగు భాష, కవిత్వం, కవుల గురించి ప్రత్యేక కార్యక్రమం నిర్వహించారు.గ్రంథాలయాధికారి కె.ఎస్.ఎస్. ప్రసాద్ ఈ కార్యక్రమాన్ని నిర్వహించారు. ముఖ్య అతిథిగా హాజరైన వెంకటేశ్వరరావు విద్యార్థులను ఉద్దేశించి ప్రసంగించారు. తెలుగు భాషా గొప్పతనం, కవిత్వంలోని భావగాంభీర్యం, రచనల ప్రాధాన్యత, కవుల సాహిత్య సేవలను వివరించారు. విద్యార్థులు పుస్తక పఠనాన్ని అలవాటు చేసుకోవడంతో పాటు సృజనాత్మక రచనలపై ఆసక్తి పెంచుకోవాలని సూచించారు.ఈ కార్యక్రమంలో విశ్రాంత అధ్యాపకులు కె. ఉమామహేశ్వరరావు, చి. అంకయ్య, , సిబ్బంది ఎన్. రమేష్, పాఠశాల విద్యార్థులు, పాఠకులు పాల్గొన్నారు.
గన్నవరం ఏలియ, సత్తెనపల్లి ఇన్ఛార్జ్