మాచినేనిపాలెంలో విద్యుత్ కేబుల్ సమస్యకు పరిష్కారం.

వత్సవాయి మేజర్ న్యూస్ :- మండలంలోని మాచినేనిపాలెం గ్రామ ఎస్సీ కాలనీలో గత ఆరు, ఏడు సంవత్సరాలుగా విద్యుత్ కేబుల్ దెబ్బతినడంతో వర్షాకాలంలో తరచూ విద్యుత్ సరఫరాకు అంతరాయం ఏర్పడుతూ ప్రజలు తీవ్ర ఇబ్బందులు ఎదుర్కొంటున్నారు. ఎట్టకేలకు ఈ సమస్యకు విద్యుత్ శాఖ అధికారులు పరిష్కారం చూపారు.ఎస్సీ కాలనీలో కేబుల్ దెబ్బతిన్న విషయాన్ని పాపగంటి ఆశీర్వాదం పలుమార్లు విద్యుత్ శాఖ అధికారుల దృష్టికి తీసుకెళ్లారు. అయితే సమస్య పరిష్కారం కాకపోవడంతో పిజిఆర్ఎస్‌లో ఫిర్యాదు చేశారు. పిజిఆర్ఎస్ ఫిర్యాదుపై విద్యుత్ శాఖ అధికారులు స్పందించి సమస్యను పరిశీలించారు.జగ్గయ్యపేట విద్యుత్ శాఖ ఏడీ శ్రీనివాసరావు ఫిర్యాదును పరిశీలించి మాచినేనిపాలెం గ్రామానికి సుమారు రెండు కిలోమీటర్ల కొత్త కేబుల్‌ను మంజూరు చేయించారు. అనంతరం కేబుల్ ఏర్పాటు చేసి విద్యుత్ సరఫరా సమస్యను పరిష్కరించారు.వర్షాకాలంలో కూడా విద్యుత్ సరఫరాకు అంతరాయం కలగకుండా లైన్‌మ్యాన్ రాంబాబు, జేఎల్‌ఎం షరీఫ్ ప్రత్యేక చర్యలు తీసుకున్నారు. దీంతో ఎస్సీ కాలనీ ప్రజలు ఊపిరి పీల్చుకున్నారు.ఈ సందర్భంగా గ్రామస్థులు మాట్లాడుతూ.. గత ఆరు, ఏడు సంవత్సరాలుగా కేబుల్ దెబ్బతినడంతో వర్షాకాలంలో ముఖ్యంగా రాత్రి వేళల్లో విద్యుత్ సరఫరా నిలిచిపోయి తీవ్ర ఇబ్బందులు పడుతున్నామని తెలిపారు. సమస్యను అధికారుల దృష్టికి తీసుకెళ్లి, పిజిఆర్ఎస్ ద్వారా ఫిర్యాదు చేసి పరిష్కారం చూపించినందుకు విద్యుత్ శాఖ అధికారులకు కృతజ్ఞతలు తెలిపారు.ఈ కార్యక్రమంలో విద్యుత్ శాఖ సిబ్బందితో పాటు గ్రామ పెద్దలు కాకాని సురేష్‌బాబు, పాపగంటి ఆశీర్వాదం, పోలేపల్లి మురళి, కాకాని క్రాంతికుమార్, విద్యా కమిటీ వైస్ చైర్మన్ ధనకొండ నరసయ్య, పల్లికంటి ఆదం, గద్దల సుక్కయ్య తదితరులు పాల్గొన్నారు.