లక్ష్మీనరసింహస్వామి ఆలయ ధర్మకర్తపై దాడికి యత్నం

మంత్రాలయం రూరల్:  సూర్య ప్రతినిధి ;మండల పరిధిలోని మాధవరం గ్రామంలో వెలసిన శ్రీ లక్ష్మీనరసింహ స్వామి ఆలయ ధర్మకర్త నర్సిరెడ్డిపై సోమవారం దాడికి యత్నం జరిగినట్లు ఆయన ఆరోపించారు. ఈ ఘటనకు సంబంధించి ఆలయ ధర్మకర్తలు నర్సిరెడ్డి, సునీత విలేకరుల సమావేశం నిర్వహించి వివరాలు వెల్లడించారు.
ఈ సందర్భంగా వారు మాట్లాడుతూ, తమ సొంత అన్నదమ్ములైన శ్రీనివాసరెడ్డి, రామ్మోహన్‌రెడ్డి, పృథ్వీ తమపై దాడికి యత్నించారని ఆరోపించారు. కొంతకాలంగా తాము ఆలయ ధర్మకర్తలుగా కొనసాగుతున్నామని, తమ ఆధ్వర్యంలో ఆలయం అభివృద్ధి చెందుతోందని తెలిపారు. సుమారు రూ.30 లక్షలతో ఆలయ అభివృద్ధి పనులు చేపట్టినట్లు పేర్కొన్నారు.
ఆలయ హుండీకి సంబంధించిన సుమారు రూ.35 వేల నగదును రామ్మోహన్‌రెడ్డి అక్రమంగా వినియోగించుకున్నారని వారు ఆరోపించారు. ఈ విషయంతో పాటు ఆలయ అభివృద్ధి నేపథ్యంలో ఏర్పడిన విభేదాల కారణంగానే తమపై కక్ష పెంచుకుని దాడికి యత్నించారని పేర్కొన్నారు. ఆలయంలో ఏర్పాటు చేసిన బ్యానర్‌ను చించివేశారని, అర్చకుడిని సైతం బెదిరించారని ఆరోపించారు. ఆలయ అర్చకుడి జీతాలను తామే చెల్లిస్తున్నామని తెలిపారు.
ఈ ఘటనపై మాధవరం పోలీస్‌ స్టేషన్‌లో ఫిర్యాదు చేసినట్లు నర్సిరెడ్డి వెల్లడించారు. తమపై దాడికి యత్నించినట్లు ఆరోపణలు ఎదుర్కొంటున్న శ్రీనివాసరెడ్డి, రామ్మోహన్‌రెడ్డి, పృథ్వీపై కేసు నమోదు చేసి చర్యలు తీసుకోవాలని పోలీసులను కోరారు. ఆలయ నిర్వహణకు సంబంధించిన రోజువారీ ఖర్చులను సైతం తామే భరిస్తున్నామని తెలిపారు.
ఈ ఘటనపై పోలీసుల విచారణ అనంతరం వాస్తవాలు వెల్లడికావాల్సి ఉంది

నాగరాజు సూర్య రూరల్ ప్రతినిధి మంత్రాలయం కర్నూలు జిల్లా