కృష్ణా జిల్లా వెదురుపావులూరు టోల్ ప్లాజా వద్ద ఉద్రిక్తత
కృష్ణా జిల్లా వెదురుపావులూరు టోల్ ప్లాజా వద్ద తీవ్ర ఉద్రిక్త వాతావరణం నెలకొంది. ఏలూరు నుంచి గుంటూరు వైపు వెళ్లే మార్గంలో ఉన్న 6 టోల్ గేట్లకు అడ్డంగా 20 టిప్పర్ లారీలను నిలిపివేయడంతో వాహనాల రాకపోకలకు తీవ్ర అంతరాయం కలిగింది. టోల్ రుసుము చెల్లించిన తర్వాతే లారీలను ముందుకు వెళ్లనిస్తామని టోల్ ప్లాజా సిబ్బంది స్పష్టం చేయగా, తాము ప్రభుత్వ ప్రాజెక్టు పనుల నిమిత్తం మట్టిని తరలిస్తున్నందున టోల్ మినహాయింపు ఉంటుందని లారీ డ్రైవర్లు వాదనకు దిగారు. ఇరువర్గాల మధ్య గొడవ జరగడంతో సమాచారం అందుకున్న గన్నవరం పోలీసులు వెంటనే సంఘటనా స్థలానికి చేరుకున్నారు. ప్రస్తుతానికి డ్రైవర్లు టోల్ రుసుము చెల్లించి వెళ్లాలని, ఆ తర్వాత సంబంధిత కాంట్రాక్ట్ సంస్థ నుంచి ఆ మొత్తాన్ని వసూలు చేసుకోవాలని పోలీసు అధికారులు లారీ డ్రైవర్లకు సూచించి పరిస్థితిని సర్దుబాటు చేసేందుకు ప్రయత్నిస్తున్నారు.
