కూటమిలో సీట్ల లొల్లి-తేలని పంచాయితీ -మేయర్, ఛైర్మన్ సీట్లపై పవన్ సీరియస్ -రెండు గంటల పాటు చంద్రబాబు, మనోహర్, మాధవ్ మంతనాలు -పల్లా శ్రీనివాస్‌కు అప్పగింత
ఎడ్యుకేషన్ స్టాఫ్ రిపోర్టర్ : స్థానిక సంస్థల ఎన్నికల సమయం దగ్గరపడుతున్నా కూటమిలో సీట్ల పంచాయితీ మాత్రం ఇంకా కొలిక్కి రావడం లేదు. టీడీపీ, జనసేన, బీజేపీ మధ్య సీట్ల సర్దుబాటుపై ప్రతిష్టంభన కొనసాగుతోంది. ముఖ్యంగా కీలకమైన మేయర్, మున్సిపల్ ఛైర్మన్ సీట్ల విషయంలో జనసేన గట్టి పట్టుబడుతున్నట్లు విశ్వసనీయ సమాచారం.
అగ్రనేతలు సుదీర్ఘ భేటీ-హై టెన్షన్
సీటు సర్దుబాటుపై ముఖ్యమంత్రి నారా చంద్రబాబు నాయుడు నివాసంలో జనసేన సీనియర్ నేత, మంత్రి నాదెండ్ల మనోహర్, బీజేపీ నేత మాధవ్‌తో దాదాపు రెండు గంటలకు పైగా సుదీర్ఘ చర్చలు జరిపారు. పలు కార్పొరేషన్లు, మున్సిపాలిటీల్లో తమకు మేయర్, ఛైర్మన్ పదవులు కేటాయించాలని జనసేన అధినేత పవన్ కల్యాణ్ డిమాండ్ చేస్తున్నట్లు తెలుస్తోంది. పవన్ ప్రతిపాదనలను మనోహర్ ద్వారా చంద్రబాబుకు చేరవేయగా, వాటి సాధ్యాసాధ్యాలపై సీఎం చంద్రబాబు, టీడీపీ రాష్ట్ర అధ్యక్షుడు పల్లా శ్రీనివాసరావు కసరత్తు చేస్తున్నట్లు సమాచారం.
సీట్లుపై కూటమిలో ఉత్కంఠ
టీడీపీ అన్ని స్థానాల్లో బలంగా ఉందని భావిస్తుండగా, జనసేన తమ బలం ఉన్న చోట్ల పట్టుబడుతుండటంతో పంచాయితీ తేలడం లేదు. బీజేపీ కూడా తన వాటా కోసం ప్రయత్నిస్తోంది. స్థానిక ఎన్నికల్లో కూటమి ఐక్యంగా వెళ్తుందా? విడివిడిగా పోటీ చేస్తుందా? అనే దానిపై తుది నిర్ణయం ఇంకా రాలేదు. దీంతో కింది స్థాయి నాయకులు, కార్యకర్తల్లో ఉత్కంఠ నెలకొంది.
