కొంకుదురు గ్రంథాలయంలో పుస్తక ప్రదర్శన.

 బిక్కవోలు మేజర్ న్యూస్: 59వ జాతీయ గ్రంథాలయ వారోత్సవాల్లో భాగంగా ఆదివారం మండలంలోని, కొంకుదురు శాఖా గ్రంథాలయంలో రెండో రోజు పుస్తక ప్రదర్శన నిర్వహించారు. అలాగే ‘చదవడం మాకిష్టం’ కార్యక్రమంలో భాగంగా సండే స్టోరీ టైం కార్యక్రమాన్ని నిర్వహించారు.ఈ కార్యక్రమానికి ముఖ్య అతిథులుగా ఎస్.కె.ఎస్.ఆర్. జడ్పీ ఉన్నత పాఠశాల ప్రధానోపాధ్యాయులు ఎం. శ్రీనివాస్, పాఠకులు చక్రవర్తి, రాఘవరెడ్డి, విజయశేఖర్ రెడ్డి తదితరులు హాజరయ్యారు.ఈ సందర్భంగా శ్రీనివాస్ మాట్లాడుతూ పుస్తక పఠనం మానసిక ఆహ్లాదాన్ని కలిగించడమే కాకుండా విజ్ఞానాన్ని పెంపొందిస్తుందని, పోటీ ప్రపంచంలో విజయానికి దోహదపడుతుందని అన్నారు. నేటి రోజుల్లో పుస్తక పఠనం తగ్గడం ఆందోళనకరమని, ఇటువంటి ప్రదర్శనల ద్వారా విద్యార్థుల్లో చదివే అలవాటును పెంపొందించుకోవాలని సూచించారు.ఈ కార్యక్రమానికి గ్రంథాలయ అధికారి ఎన్. బాల అధ్యక్షత వహించగా, విద్యార్థులు, ఉపాధ్యాయులు, పాఠకులు పాల్గొన్నారు.