జిల్లాలో నూనెగింజల ఉత్పత్తి అభివృద్ధికి సహకరించాలి

నెల్లూరు రూరల్, మేజర్ న్యూస్ :  జాతీయ  నూనెల గింజల మిషన్  పధకం ద్వారా ఈ రబీ 2026 సీజన్ లో వేరుశెనగ, నువ్వుల సాగుకు 100 శాతం రాయితీపై విత్తనాల పంపిణీ  
జాతీయ  నూనెల గింజల మిషన్ – ఆయిల్ సీడ్స్ (ఎన్. ఎమ్. ఇ. ఓ -ఓ ఎస్) పథకం కింద రబీ 2026 సీజన్‌లో నూనెగింజల పంటల సాగును ప్రోత్సహించేందుకు నెల్లూరు జిల్లాలో రెండు వ్యాల్యూ చైన్ క్లస్టర్లను (వీసీసీ ) ఏర్పాటు చేసినట్లు జిల్లా వ్యవసాయ అధికారిణి పి సత్యవాణి ఒక ప్రకటనలో తెలిపారు.ఈ పథకం కింద జిల్లాకు కేటాయించిన క్లస్టర్ల వివరాలు:
వేరుశెనగ: 500 హెక్టార్ల విస్తీర్ణంలో ఒక క్లస్టర్,నువ్వులు: 200 హెక్టార్ల విస్తీర్ణంలో ఒక క్లస్టర్.ఈ క్లస్టర్ల పరిధిలో నూనెగింజల సాగు చేపట్టే అర్హులైన రైతులకు వేరుశెనగ మరియు నువ్వుల విత్తనాలను 100 శాతం రాయితీపై ఉచితంగా పంపిణీ చేయనున్నట్లు జిల్లా వ్యవసాయ అధికారి తెలిపారు.కావున, రబీ 2026 సీజన్‌లో వేరుశెనగ, నువ్వుల సాగు చేయడానికి ఆసక్తి కలిగిన రైతులు తమ సంబంధిత మండల వ్యవసాయ అధికారులను ( ఎం ఏ ఓ) సంప్రదించి వివరాలు నమోదు చేసుకోవాలని సూచించారు.
రైతులు ఈ అవకాశాన్ని సద్వినియోగం చేసుకొని నూనెగింజల సాగు విస్తీర్ణం పెంపునకు, జిల్లాలో నూనెగింజల ఉత్పత్తి అభివృద్ధికి సహకరించాలని జిల్లా వ్యవసాయ అధికారి కోరారు.