జల సంరక్షణ పనులు వేగవంతం చేయాలి... పిడి శారదా దేవి

బాడంగి, సూర్య : జల సంరక్షణ పనులతో రైతులకు ఎంతో ప్రయోజనం చేకూరుతుందని  పథక సంచాలకురాలు ఎస్‌. శారదాదేవి తెలిపారు. బుధవారం మండలంలో పర్యటించిన ఆమె గొల్లాది పంచాయతీ పరిధిలోని కామన్నవలసలో ఉపాధి హామీ పథకం కింద చేపట్టిన కందకాల పనులను పరిశీలించి, కూలీలతో మాట్లాడారు. ప్రతి రైతు జల సంరక్షణ పనులను సద్వినియోగం చేసుకోవాలని సూచించారు.
కోడూరు పంచాయతీ పరిధిలోని బ్రాహ్మణవలసలో 4.50 ఎకరాల్లో చేపట్టిన పండ్ల తోటలను పరిశీలించి, ఆరుగురు రైతులతో మాట్లాడారు. ఉద్యాన పంటల సాగును ప్రోత్సహించాలని సూచించారు. అనంతరం డాక్టర్‌ బి.ఆర్‌. అంబేడ్కర్‌ గురుకుల పాఠశాలలో అనంత అరణ్య ప్లాంటేషన్‌ పనులను పరిశీలించారు.
మండల కార్యాలయంలో పథక సిబ్బందితో నిర్వహించిన సమీక్షలో మంజూరైన జల సంరక్షణ, వ్యవసాయ కుంటలు, ఇంకుడు గుంతలు, చేపల చెరువులు, ఉద్యాన తోటల పనులను వేగవంతం చేయాలని ఆదేశించారు. ప్రతి కుటుంబానికి ఏడాదికి 125 రోజుల పని కల్పించాలని, రోజువారీ సగటు వేతనం రూ.312 వచ్చేలా చూడాలని సూచించారు. పనుల కల్పనలో నిర్లక్ష్యం వహిస్తే చర్యలు తప్పవని హెచ్చరించారు. ఈ కార్యక్రమంలో ఏపీవో కె. సాయిరాం, జేఈ ఏ. హరినారాయణ, సాంకేతిక సహాయకులు శంకరరావు, ఉమ, రామారావు, క్షేత్ర సహాయకులు ఈశ్వరరావు, పాపయ్య, సుందరాణి తదితరులు పాల్గొన్నారు.

రిపోర్టర్ : శ్రీనివాసరావు, బాడంగి, విజయనగరం జిల్లా.