జగ్గయ్యపేట లో భూ మేత!

జగ్గయ్యపేటలో భూ మేత!

_పుట్టబజారులో మరో జిల్లా పరిషత్ స్థలం కబ్జాకు యత్నం.._

_కోట్ల రూపాయల విలువైన 30 సెంట్లకుపైగా స్థలంపై అక్రమార్కుల కన్ను.._

_ఒకవైపు ఎన్నికల బిజీలో అధికారులు.. మరోవైపు కబ్జాకు ప్రయత్నాలు!_

    పట్టణంలోని పుట్టబజారులో ఉన్న జిల్లా పరిషత్‌కు చెందిన దాదాపు 30 సెంట్లకుపైగా కోట్ల రూపాయల విలువైన స్థలాన్ని కబ్జా చేసేందుకు కొందరు వ్యక్తులు తీవ్ర ప్రయత్నాలు చేస్తున్నారు. ఇప్పటికే ఈ ప్రాంతంలో ఎంతో విలువైన స్థలం కబ్జాకు గురైంది.
    పుట్టబజార్‌లోని మెయిన్ రోడ్డుకు ఆనుకుని ఉన్న జిల్లా పరిషత్ స్థలంలో ఇదివరకు ఆలయం పేరుతో గుడి నిర్మించారు. మరో స్థలంలో వాటర్ ప్లాంట్ ఏర్పాటు చేశారు. దాని పక్కనే లేడీస్ వస్త్ర దుకాణం కూడా పెట్టారు. ఇప్పుడు వీటి మధ్యలో ఉన్న 30 సెంట్లకు పైగా ఖాళీ స్థలంపై కొందరి కన్ను పడింది. స్థలాన్ని చదును చేయిస్తున్నారు. చుట్టూ ఫెన్సింగ్ ఏర్పాటుకు చురుగ్గా ప్రయత్నాలు జరుగుతున్నాయి. తలా రెండు సెంట్ల చొప్పున పంచుకునేందుకు పావులు కదుపుతున్నట్లు స్థానికంగా చర్చ జరుగుతోంది.
    నెల రోజుల క్రితం అధికారులు "ఇది జిల్లా పరిషత్‌కు సంబంధించిన భూమి" అని ఫ్లెక్సీలు ఏర్పాటు చేశారు. వాటిని కూడా కొందరు తొలగించారు. ఒకవైపు స్థానిక ఎన్నికల నేపథ్యంలో మునిసిపల్, రెవెన్యూ అధికారులు, పోలీసులు విధుల్లో బిజీగా ఉండగా మరోవైపు ఇదే అదునుగా భావించి కొంతమంది స్థలం కబ్జాకు పాల్పడుతున్నట్లు ఆరోపణలు వినిపిస్తున్నాయి. కోట్ల రూపాయల విలువైన ప్రభుత్వ స్థలంలోని వాటర్ ప్లాంట్, వస్త్ర దుకాణాన్ని తొలగించడంతో పాటు కొత్తగా కబ్జాకు గురికాబోతున్న భూమిని కూడా  అక్రమార్కుల చెర నుంచి కాపాడాల్సిన బాధ్యత అధికారులపై ఉంది. అయితే కఠిన చర్యలు తీసుకుంటారా? లేక ఎప్పటిలాగే మిన్నకుంటారో వేచి చూడాలి!

రిపోర్టర్ :శివ జగ్గయ్యపేట ఎన్టీఆర్ జిల్లా