జాతీయ స్థాయి కబడ్డీ పోటీలకు కోటబొమ్మాళి విద్యార్థినులు ఎంపిక
కోటబొమ్మాళి, మేజర్ న్యూస్: పంజాబ్ రాష్ట్రంలోని ఫరీద్కోట్లో ఈ నెల 26 నుంచి 29 వరకు జరగనున్న 52వ జాతీయ స్థాయి కబడ్డీ పోటీలలో ఆంధ్రప్రదేశ్ జట్టు తరఫున స్థానిక ప్రభుత్వ జూనియర్ కళాశాలకు చెందిన విద్యార్థినులు జె. చంద్రలేఖ, జె. కవిత ఎంపికయ్యారు. ఈ విషయాన్ని కళాశాల ప్రిన్సిపాల్ అరంగి అప్పన్న ఆదివారం వెల్లడించారు. అక్టోబరు 16 నుంచి 18 వరకు మార్కాపురంలో నిర్వహించిన 52వ రాష్ట్ర స్థాయి జూనియర్ బాలబాలికల కబడ్డీ టోర్నమెంట్లో శ్రీకాకుళం జిల్లా బాలికల జట్టు తరఫున ఆడి వీరు తృతీయ స్థానం సాధించారు. జాతీయ స్థాయి పోటీలకు ఎంపికైన విద్యార్థినులను డివిఈవో ఆర్. సురేష్, ఎంఈవో డబ్బీరు గోవిందరావు, కళాశాల అధ్యాపకులు, తల్లిదండ్రులు, గ్రామ పెద్దలు అభినందించి, పోటీలలో మంచి ప్రతిభ కనబరచాలని ఆకాంక్షించారు.