హాస్ట‌ల్ మెస్‌ల‌ను ప‌రిశీలించిన వి. సి
విశాఖ ఎడ్యుకేషన్, సూర్య : ఆంధ్ర‌విశ్వ‌విద్యాల‌యం ఇంజ‌నీరింగ్ క‌ళాశాల విద్యార్థుల మెస్‌ల‌ను ఏయూ అధికారులు ఆక‌స్మికంగా త‌నిఖీ చేశారు. విద్యార్థులకు అందించే భోజ‌న నాణ్య‌త‌ను ప్ర‌త్య‌క్షంగా ప‌రిశీలించారు. ఆహార ప‌దార్ధాల రుచి, నాణ్య‌త‌ను వీసీ ఆచార్య జి.పి రాజ‌శేఖ‌ర్ త‌నిఖీ చేసి, సిబ్బందికి త‌గిన సూచ‌న‌లు చేశారు. విద్యార్థులు ప‌రిశుభ్ర‌మైన వాతావ‌ర‌ణంలో, రుచిక‌ర‌మైన ఆహారాన్ని అందించాల‌ని సిబ్బందికి సూచించారు. భోజ‌న నాణ్య‌త‌లో రాజీ ప‌డ‌వ‌ద్ద‌ని మెస్ నిర్వాహ‌కులు, కుక్‌ల‌కు ఆదేశించారు. విద్యార్థుల‌తో స్వ‌యంగా మాట్లాడి భోజ‌న నాణ్య‌త‌పై ఆరాతీసారు. మెస్‌ల‌పై ఎటువంటి స‌మ‌స్య‌లు ఉన్నా వెంట‌నే సంబంధిత వార్డెన్‌లు, చీఫ్ వార్డెన్‌ల దృష్టికి తీసుకురావాల‌న్నారు. అధికారులు ఎల్ల‌వేళ‌లా అందుబాటులో ఉంటార‌ని, ఎటువంటి ఇబ్బందులు లేకుండా చూస్తార‌న్నారు. విద్యార్థులు త‌మ స‌మ‌స్య‌ల‌ను అధికారులు దృష్టికి తీసుకువ‌స్తే స‌త్వ‌రం ప‌రిష్కారం చేసే విధంగా అధికారులంతా ప‌నిచేస్తున్నామ‌నే విష‌యం గ‌మ‌నించాల‌న్నారు. విద్యార్థులు అధికారుల‌కు స‌హ‌క‌రిస్తూ మెస్‌ల నిర్వ‌హ‌ణ మ‌రింత మెరుగుప‌ర‌చే దిశ‌గా స‌మిష్టిగా కృషిచేయాల‌న్నారు. వీసీ వెంట ఇంజ‌నీరింగ్ క‌ళాశాల ప్రిన్సిపాల్ ఆచార్య కె.వెంక‌ట సుబ్బ‌య్య, రెక్టార్ ఆచార్య పులిపాటి కింగ్‌, రిజిస్ట్రార్ ఆచార్య కె.రాంబాబు త‌దిత‌రులు పాల్గొన్నారు.
