ఎన్నికల విధుల్లో సమన్వయంతో పనిచేయాలి: సీఐ వాసునాయుడు

గాజువాక, సూర్య : నవంబరు 1న జరగనున్న జీవీఎంసీ ఎన్నికలను ప్రశాంత వాతావరణంలో, పారదర్శకంగా నిర్వహించేందుకు పోలీసు సిబ్బంది నిరంతరం అప్రమత్తంగా ఉండాలని గాజువాక సీఐ చింతా వాసునాయుడు సూచించారు. శుక్రవారం గాజువాక పోలీస్‌స్టేషన్‌ పరిధిలోని రూట్‌ మొబైల్‌ అధికారులు, స్టాటిక్‌ బందోబస్తు సిబ్బందితో ఆయన ఎన్నికల భద్రతపై సమీక్షా సమావేశం నిర్వహించారు. పోలింగ్‌ కేంద్రాల వద్ద ఎలాంటి అవాంఛనీయ ఘటనలు జరగకుండా శాంతిభద్రతల పరిరక్షణకు అత్యంత ప్రాధాన్యమివ్వాలని, సిబ్బంది సమయపాలన పాటిస్తూ తమకు కేటాయించిన కేంద్రాలకు ముందుగానే చేరుకుని సమన్వయంతో పనిచేయాలని ఆదేశించారు. రూట్‌ మొబైల్‌ అధికారులు తమ పరిధిలో నిరంతరం పర్యటిస్తూ సమస్యాత్మక ప్రాంతాలపై ప్రత్యేక దృష్టి సారించాలని సీఐ స్పష్టం చేశారు. పోలింగ్‌ కేంద్రాల వద్ద క్రమశిక్షణతో వ్యవహరించాలని, అనుమానాస్పద వ్యక్తులు లేదా కార్యకలాపాలు కనిపిస్తే తక్షణమే ఉన్నతాధికారులకు సమాచారం అందించాలన్నారు. ఓటర్లు స్వేచ్ఛగా తమ ఓటు హక్కును వినియోగించుకునేలా పటిష్ఠ భద్రత కల్పించాలని, ఎన్నికల నియమావళిని ఉల్లంఘించే వారిపై చట్టప్రకారం చర్యలు తీసుకోవాలని సిబ్బందికి దిశానిర్దేశం చేశారు.