ఎంపీపీ, జడ్పీ పీఠాలకు ముహూర్తం ఫిక్స్!

( విజయనగరం బ్యూరో, సూర్య ) 
స్థానిక సంస్థల ఎన్నికల సమరంలో కీలక ఘట్టానికి ముహూర్తం ఖరారైంది. మండల, జిల్లా పరిషత్‌ అధ్యక్ష, ఉపాధ్యక్ష పీఠాల ఎన్నికలకు రాష్ట్ర ఎన్నికల సంఘం (ఎస్ఈసీ) షెడ్యూల్‌ ప్రకటించింది. ఈనెల 19, 20 తేదీల్లో ఎన్నికల ప్రక్రియ నిర్వహించేందుకు అధికారులను ఆదేశించింది. దీంతో మండల, జిల్లా పరిషత్‌ పీఠాలపై పట్టు సాధించేందుకు రాజకీయ పార్టీలు తమ వ్యూహాలకు పదును పెట్టనున్నాయి.

జిల్లావ్యాప్తంగా 27 మండల ప్రజా పరిషత్‌లకు అధ్యక్ష, ఉపాధ్యక్ష ఎన్నికలతోపాటు, జిల్లా పరిషత్‌కు ఛైర్మన్, వైస్‌ఛైర్మన్ ఎన్నికలు నిర్వహించనున్నారు. ఈనెల 19న ఎంపీపీలు, 20న జడ్పీ ఛైర్మన్లు, వైస్‌ఛైర్మన్ల ఎన్నికల ప్రక్రియ చేపట్టనున్నారు. ఇందుకోసం అవసరమైన సమావేశాలు నిర్వహించాలని సంబంధిత అధికారులకు ఎస్ఈసీ ఆదేశాలు జారీ చేసింది.
చేతులెత్తే పద్ధతిలో ఎన్నికలు
ఎంపీపీలు, జడ్పీ ఛైర్మన్లు, వైస్‌ఛైర్మన్ల ఎన్నికల ప్రక్రియ చేతులెత్తే పద్ధతిలో జరగనుంది. ఎన్నికల నిర్వహణకు సంబంధించి అధికారులు అవసరమైన ఏర్పాట్లు చేపట్టనున్నారు. ఎన్నికల సమావేశాల్లో సభ్యుల మద్దతు ఆధారంగా అధ్యక్ష, ఉపాధ్యక్ష స్థానాలకు అభ్యర్థుల ఎన్నిక పూర్తికానుంది.

పీఠాలపై రాజకీయ పార్టీల కన్ను
ఎంపీపీ, జడ్పీ ఛైర్మన్‌ పదవులు స్థానిక రాజకీయాల్లో కీలకమైనవి కావడంతో ఆయా పార్టీల్లో ఎన్నికలపై ఆసక్తి నెలకొంది. మెజార్టీ ఉన్న చోట్ల పీఠాలను దక్కించుకోవడంపై పార్టీలు దృష్టి సారిస్తుండగా, హంగ్‌ పరిస్థితులు నెలకొన్న ప్రాంతాల్లో రాజకీయ సమీకరణాలు మరింత ఆసక్తికరంగా మారనున్నాయి. సభ్యుల మద్దతు కూడగట్టడం, ప్రత్యర్థి పార్టీల వ్యూహాలను తిప్పికొట్టడం వంటి అంశాలు ఎన్నికల్లో కీలకంగా మారనున్నాయి. ఈనెల 19, 20 తేదీల్లో జరగనున్న ఎన్నికలతో మండల, జిల్లా పరిషత్‌లకు కొత్త నాయకత్వం కొలువుదీరనుంది. దీంతో పరిషత్‌ పీఠాల కోసం సాగుతున్న రాజకీయ పోరుకు త్వరలోనే తెరపడనుంది.