గిరిజన రైతులకు వాణిజ్య పుట్టగొడుగుల సాగుపై శిక్షణా కార్యక్రమం

గరుగుబిల్లి, సూర్య : పార్వతీపురం ఐసీఏఆర్ గిరిజన ఉప ప్రణాళిక 2025–26 కార్యక్రమంలో భాగంగా డాక్టర్ వై. ఎస్.ఆర్. ఉద్యాన విశ్వవిద్యాలయం, ఉద్యాన కళాశాల, పార్వతీపురం ఆధ్వర్యంలో పార్వతీపురం మన్యం జిల్లాకు చెందిన గిరిజన రైతులకు వాణిజ్య పుట్టగొడుగుల ఉత్పత్తి సాంకేతిక పరిజ్ఞానంపై శిక్షణా కార్యక్రమంను నిర్వహించారు. ఈ కార్యక్రమంలో ప్రాజెక్టు ప్రధాన పరిశోధకురాలు డాక్టర్ ఎన్. ఝాన్సీరాణి, సహాయ ఆచార్యులు (వృక్ష రోగ శాస్త్రం), రైతులకు వాణిజ్య ప్రాధాన్యత కలిగిన పుట్టగొడుగుల సాగు విధానాలపై సమగ్ర అవగాహన కల్పించారు. బటన్, ఆయిస్టర్, పాడి స్ట్రా వంటి వివిధ రకాల పుట్టగొడుగుల సాగుకు అనువైన వాతావరణ పరిస్థితులు, అవసరమైన ముడి పదార్థాలు, కంపోస్టు తయారీ, విత్తనం (స్పాన్) ఎంపిక, సాగు పద్ధతులు, కోత మరియు నిల్వ వంటి అంశాలను గురించి తెలియజేశారు. వ్యవసాయ వ్యర్థాలను ఉపయోగించుకుని తక్కువ పెట్టుబడి తో పుట్టగొడుగుల సాగు చేపట్టి అదనపు ఆదాయం పొందే అవకాశా లను వివరించారు. అదే విధంగా పుట్టగొడుగుల, ఆయిస్టర్ విత్తనాలను గిరిజన రైతులకు అందజేశారు. ఈసందర్భంగా కళాశాల అసోసియేట్ డీన్ డాక్టర్ ఆర్. రాజ్యలక్ష్మి, ప్రాజెక్టు సహ పరిశోధకులు డాక్టర్ పి. ప్రదీప్ కుమార్, సహాయ ఆచార్యులు (ఉద్యానశాస్త్రం), డాక్టర్ బి. సుజాత, సహాయ ఆచార్యులు (కీటక శాస్త్రం) పాల్గొని ప్రసంగించారు. పుట్టగొడుగుల సాగు రైతులకు అదనపు ఆదాయ వనరుగా మాత్రమే కాకుండా, నిరుద్యోగ యువతకు స్వయం ఉపాధి అవకాశాలను కల్పించడంతో పాటు గిరిజన మహిళల ఆర్థిక స్వావలంబనకు ఎంతగానో దోహదపడుతుందని తెలిపారు. తక్కువ స్థలంలో, స్థానికంగా లభించే వ్యవసాయ వ్యర్థాలను వినియోగించుకొని పుట్టగొడుగులను ఉత్పత్తి చేయవచ్చని, వాటి విలువ ఆధారిత ఉత్పత్తుల తయారీ ద్వారా మరింత ఆదాయం పొందవచ్చని పేర్కొన్నారు. గిరిజన రైతుల జీవన ప్రమాణాలను మెరుగుపరచడం, మహిళలు మరియు నిరుద్యోగ యువతకు స్వయం ఉపాధి అవకాశాలు కల్పించడం, గిరిజన కుటుంబాల పోషకాహార భద్రతను పెంపొందించడం ఈ శిక్షణ కార్యక్రమం ప్రధాన లక్ష్యమని నిర్వాహకులు తెలి పారు. ఈ సందర్భంగా పుట్టగొడుగుల పెంపకంపై అవసరమైన కరపత్రాలను రైతులకు అందజేశారు.