ఎన్నికల కౌంటింగ్ దౌర్జన్యం పై కళ్యాణదుర్గం పట్టణంలో నిరసన ర్యాలీ.
కళ్యాణదుర్గం: ఎన్నికల కౌంటింగ్ సందర్భంగా చోటుచేసుకున్నాయని ఆరోపిస్తున్న దౌర్జన్యాలు, అక్రమాలను నిరసిస్తూ వైఎస్సార్ కాంగ్రెస్ పార్టీ ఆధ్వర్యంలో కళ్యాణదుర్గం పట్టణంలో భారీ నిరసన ర్యాలీ నిర్వహించారు. ఈ సందర్భంగా మాజీ ఎంపీ, వైసీపీ సమన్వయకర్త తలారి రంగయ్య మాట్లాడుతూ అధికారం ఎవరికీ శాశ్వతం కాదని, ప్రజలే ప్రజాస్వామ్యంలో అంతిమ నిర్ణేతలని అన్నారు. ప్రజలు ఇచ్చిన తీర్పును గౌరవించాల్సిన బాధ్యత ప్రతి ఒక్కరిపై ఉందని, అధికారంలో ఉన్నవారు ప్రజల ఆకాంక్షలకు అనుగుణంగా వ్యవహరించాలని పేర్కొన్నారు. అనంతరం జీకే కృష్ణమూర్తి మాట్లాడుతూ ప్రజాతీర్పును వ్యతిరేకించడం ప్రజాస్వామ్య స్ఫూర్తికి విరుద్ధమని, ప్రజల నిర్ణయాన్ని గౌరవించకపోతే ప్రభుత్వాలే కూలిపోయే పరిస్థితులు ఏర్పడతాయని వ్యాఖ్యానించారు. అధికార బలంతో ప్రజల తీర్పును ప్రభావితం చేయాలని చూడటం సరికాదన్నారు. వైసీపీ నాయకుడు ఉమామహేశ్వర నాయుడు మాట్లాడుతూ ఎన్నికల్లో ప్రజలు ఇచ్చిన తీర్పును ప్రతి ఒక్కరూ గౌరవించాలని, ఎన్నికల ప్రక్రియ పారదర్శకంగా, నిష్పక్షపాతంగా సాగాలని అన్నారు. పట్టణంలోని వాల్మీకి సర్కిల్ నుంచి అంబేద్కర్ విగ్రహం వరకు సాగిన ఈ ర్యాలీలో వైసీపీ నాయకులు, కార్యకర్తలు పెద్ద సంఖ్యలో పాల్గొన్నారు. ఎన్నికల కౌంటింగ్ సమయంలో జరిగినట్లు ఆరోపిస్తున్న ఘటనలపై నిరసన వ్యక్తం చేస్తూ ప్రజాస్వామ్య విలువల పరిరక్షణకు ప్రతి ఒక్కరూ కృషి చేయాలని నాయకులు పిలుపునిచ్చారు.
కళ్యాణదుర్గం టౌన్ రిపోర్టర్ :- బోయ రంగస్వామి.
