ఎల్‌నినో ప్రభావంతో పశువుల ఆరోగ్యంపై అప్రమత్తత అవసరం
గన్నవరం, అక్టోబర్ 3, మేజర్ న్యూస్ ప్రతినిధి. (గుర్రం ప్రసాద్).
ఎల్‌నినో పరిస్థితుల నేపథ్యంలో పశువులు, జీవాల ఆరోగ్యం, ఉత్పాదకతను కాపాడేందుకు రైతులు తగిన జాగ్రత్తలు తీసుకోవాలని నిపుణులు సూచించారు. శ్రీ వెంకటేశ్వర పశువైద్య విశ్వవిద్యాలయం పరిధిలోని ఎన్టీఆర్ పశువైద్య కళాశాల, గన్నవరం జాతీయ సేవా పథకం ఆధ్వర్యంలో సావరగూడెంలో అవగాహన కార్యక్రమం నిర్వహించారు.
కళాశాల అసోసియేట్ డీన్ ప్రొఫెసర్ వై. రమణారెడ్డి అధ్యక్షతన జరిగిన కార్యక్రమంలో డాక్టర్ మేరి వైడూర్యం మాట్లాడుతూ, ఎల్‌నినో పరిస్థితుల్లో పశువుల ఆరోగ్య పరిరక్షణకు అవసరమైన చర్యలను వివరించారు. పశుసంవర్ధక శాఖ అందించే పథకాలను రైతులు సద్వినియోగం చేసుకోవాలని సూచించారు.
ఎన్‌ఎస్‌ఎస్ ప్రోగ్రాం అధికారులు డాక్టర్ రాంబాబు, డాక్టర్ షేక్ మస్తాన్ బి మాట్లాడుతూ అధిక ఉష్ణోగ్రతలు, తక్కువ వర్షపాతం కారణంగా మేత తీసుకోవడం తగ్గడం, పాల దిగుబడి పడిపోవడం, పునరుత్పత్తి సమస్యలు, నీటి కొరత వంటి సమస్యలు తలెత్తే అవకాశం ఉందన్నారు. పశువులకు రోజంతా స్వచ్ఛమైన, చల్లటి నీటిని అందుబాటులో ఉంచాలని, తీవ్రమైన ఎండ సమయంలో బయటకు తీసుకెళ్లకుండా ఉదయం, సాయంత్రం వేళల్లో మేత అందించాలని సూచించారు.
డాక్టర్ రమేష్ బాబు మాట్లాడుతూ సమతుల్య పోషకాహారం అందించడంతో పాటు పశువుల ఆరోగ్య పరిస్థితిని నిరంతరం పర్యవేక్షించాలని తెలిపారు. అనంతరం రైతులతో కలిసి అవగాహన ర్యాలీ నిర్వహించారు. కార్యక్రమంలో డాక్టర్ వసంతకుమారి, పశుపోషకులు, జీవాల పెంపకందారులు, విద్యార్థినీ విద్యార్థులు, పశువైద్య సిబ్బంది పాల్గొన్నారు.
