డైరీ ఫామ్‌లో ఉద్యోగం పోయిందనే కక్షతో తోటి కార్మికుడి దారుణ హత్య!

కంకిపాడు, మేజర్ న్యూస్: కృష్ణా జిల్లా కంకిపాడు పోలీస్ స్టేషన్ పరిధిలోని పునాదిపాడు ఫ్లైఓవర్ అండర్‌పాస్ సమీపంలో జరిగిన యువకుడి హత్య కేసును పోలీసులు ఛేదించారు. ఈ కేసులో బీహార్ రాష్ట్రానికి చెందిన రాకేష్ కుమార్ (28), మనీష్ కుమార్ (25)లను నవంబర్ 10న అరెస్ట్ చేసినట్లు డీఎస్పీ కడలి జయకృష్ణ తెలిపారు. బుధవారం కంకిపాడు పోలీస్ స్టేషన్‌లో ఏర్పాటు చేసిన విలేకరుల సమావేశంలో ఆయన మాట్లాడుతూ.. శ్రీ రాజ్యలక్ష్మి డైరీ ఫామ్‌లో పనిచేస్తున్న అనిల్ కుమార్ యాదవ్ (26) నవంబర్ 9వ తేదీ తెల్లవారుజామున నిద్రిస్తున్న సమయంలో ఇద్దరు నిందితులు కోడికత్తులతో దాడి చేశారు. తీవ్రంగా గాయపడిన అనిల్ కుమార్ ఆసుపత్రిలో చికిత్స పొందుతూ ఉదయం 8.45 గంటలకు మృతి చెందాడు. గతంలో ఇదే డైరీ ఫామ్‌లో పనిచేసిన రాకేష్ కుమార్ విధుల పట్ల నిర్లక్ష్యం కారణంగా ఉద్యోగం కోల్పోయాడు. అతని స్థానంలో అనిల్ కుమార్‌ను నియమించడంతో కక్ష పెంచుకున్న రాకేష్, తన స్నేహితుడు మనీష్ కుమార్‌తో కలిసి హత్యకు పథకం రచించినట్లు పోలీసుల విచారణలో వెల్లడైనట్లు డీఎస్పీ తెలిపారు. నేరానికి ఉపయోగించిన రెండు కోడికత్తులు, హోండా యాక్టివా, రెండు సెల్‌ఫోన్లు, నాలుగు దుస్తులను పోలీసులు స్వాధీనం చేసుకున్నారు. చలివేంద్రపాలెం పరిధిలోని జాతీయ రహదారిపై డైరీ 9 ఐస్‌క్రీమ్ కంపెనీ సమీపంలో నిందితులను అదుపులోకి తీసుకున్నారు. ఈ ఘటనలో పాల్గొన్నట్లు భావిస్తున్న మూడో వ్యక్తి అనీష్ కుమార్ కోసం పోలీసులు గాలిస్తున్నారు. ఈ సమావేశంలో సీఐ బి.బి. రవికుమార్, ఎస్ఐ దాసు పాల్గొన్నారు.

స్టాఫ్ రిపోర్టర్: ✍️ ప్రేమ్ రాజ్, పెనమలూరు నియోజకవర్గం, కృష్ణాజిల్లా.